Mientras cu Rusia ta sigui ataca Ucrania, varios edificio, considera como icono internacional, ta ilumina na colo blauw y geel na honor di e bandera di Ucrania. Esaki den un esfuerso pa demostra sosten na e pais. Por pensa riba edificio manera The Empire State Building na New York, na Merca; The London Eye na Inglatera; Brandenburg Gate na Berlin, Alemania; The Eiffel Tower na Paris, na Francia.
Aki na Aruba nos no ta keda man crusa y ayera nochi por a admira e edificio nobo di Gloria, riba Sasakiweg, completamente ilumina n’e colonan di e bandera di Ucrania.
P’e dianan aki, mientras cu atencion di mundo ta riba e conflicto entre Rusia y Ucrania, lo percura pa e iluminacion pafo di e edificio aki ta den e colonan geel y blauw. Di e forma aki Aruba tambe ta mustra su sosten pa e situacion doloroso cu e pueblo di Ucrania ta bibando e ultimo siman aki.
Pa un relato mas amplio lesa edicion di TREMPAN.
