E topico di UTV/ATV no ta uno desconoci pa e comunidad Arubiano. Pues, ya ta pa algun tempo caba cu tin un discusion andando tocante kico por haci encuanto e situacion cu e vehiculonan aki. Nan ta uza pa un actividad masha gusta bou di e turistanan cu ta bishita nos isla, sinembargo, e ta presenta daño riba nos medio ambiente, e ta un actividad insigur y peligroso y e ta trece molester cerca algun habitante.
Basa riba e preocupacionnan menciona, Prome Minister mr. Evelyn Wever-Croes a establece un comision pa bin cu un proposicion y na su turno, gobierno mes a introduci algun cambio. E prome den esaki ta cu ta bay introduci un legislacion pa stop e importacion dje vehiculonan aki temporalmente y tambe ta bay bin cu un moratorio riba documento di permiso otorga p’e vehiculonan aki tambe.
Mas cu claro, mester corda tambe cu e actividad aki ta un fuente di entrada pa varios compania turistico aki na Aruba. Asina George Vieira, doño di George Cycle y representante di Aruba Off-Road Foundation, a splica cu prome minister a institui e comision y a sinta cu algun departamento pa adresa e situacion, pero no a invita Aruba Off-Road Foundation p’esaki desde un principio.
Despues di esaki si nan a haya oportunidad pa sinta cu e otro organisacionnan pa asina bin cu un solucion y asina nan por a expresa kico nan mes ta haciendo pa purba minimalisa e problema cu tin asocia cu e vehiculonan aki.
Den cuadro di esaki, nan a disminui e tamaño di e tournan cu nan ta provee y cu esaki a conoce menos incidente cu e vehiculonan. Tambe nan a percura pa papia mas cu e turistanan pa splica nan kico si mag y kico no. Aunke cu ainda tin un cu e otro incidente chikito ta tuma luga, Vieira a splica cu esaki ta sosode bou di algun turista “malcria” y cu e otronan tin cu paga p’esaki.
P’esaki a brinda DOW un mapa cu un sugerencia pa pone piedra n’e area di tera cora, patras di Westpunt y na Bushirabana. Cu tur esakinan den mente, ta buscando un ‘win-win situation’. Segun Vieira a splica, unabes cu establece unda mag y no mag di core ya caba ta elimina un gran parti di e problema.
Pa un relato mas amplio lesa edicion di TREMPAN mañan.
