Mescos cu na Corsou su federacion di futbol ta practicamente bou di curatela pa mal maneho, aki na Aruba tambe e posibilidad ta grandi cu FIFA y CONCACAF lo por interveni.
E cosnan cu ta pasando cu no ta bon, cu ta mustra riba e asuntonan sospechoso y cu lo por conduci tambe na mesun tipo di desaster cu FFK a bin haya su mes aden.
Por ehempel september 2023 ta yegando su fin mañan, pero ainda directiva di AVB no a entrega e relato financiero anual di 2021, cual segun Statuut di e federacion, mester tabata entrega no mas laat cu aña di 2022, na luna di maart/april. Tin cu menciona cu e relato financiero di 2022, ainda AVB no a ni cuminsa traha mes riba esaki ainda y aki por bisa cu e rabo ta krul.
Na inicio di e aña aki, e ‘Financial Manager di AVB a dicidi di entrega su retiro pero ta notabel cu ainda e federacion no a nombra un manager financiero nobo y tin tur indicacion cu ta e presidente mes ta ocupando su mes cu e control financiero y ta bruhando tur cos. Un conflicto di interes grandi, manera FIFA ta menciona den su carta na e Federacion Futbol Korsou.
E persona aki no tin ningun preparacion pa haci e trabou aki ya cu e no tin ningun preparacion y ni experencia riba e tereno financiero pa e por haci e trabou aki loke lo conduci cu AVB ta bayendo mesun direccion cu FFK caminda intervencion di FIFA y CONCACAF ta un posibilidad grandi.
Corsou
Federacion Futbol Korsou ta den un situacion malisimo. Un situacion unda cu un ora pa otro Fédération Internationale de Football Association (FIFA) ta bay interveni, kitando tur nan autoridad. E motibo ta cu durante un control a constata un falta di maneho total pa cu finansas, conflicto interes, y controlnan necesario no ta tuma luga. Y a pesar cu a duna e ordo pa no yama un eleccion pa un directiva nobo, toch e Federacion a bay contra di esaki. Y si no para e yamada pa eleccion, FIFA ta bay tuma over.
A bisa esaki bon cla den dos carta cu a manda pa e federacion di Corsou.
E prome carta ta fecha 3 di augustus ultimo y tabata dirigi na e presidente di e Federacion, esta Ramiro Griffith.
Di dos carta
E bishita di e delegacion tabata for di 29 pa 31 di augustus y loke nan a constata a laga nan mas preocupa ainda. Den un carta manda un siman despues, pa Margareth Craneveldt, Secretario General FFK. Ta señala esaki.
Ta papia di un situacion delicado y iregular di FFK. Nan a topa cu diferente stakeholder y a haya varios recomendacion. Esaki pa stabilidad di e federacion y pa e competencianan resumi sin mas retraso.
E mesun problemanan señala den e prome carta, a topa cu nan.
A pesar di insistencia di FIFA y CONCACAF pa no yama eleccion, a tuma nota cu a yama un Congreso Extraordinario, den cual un di e puntonan di agenda ta eleccion di Presidente y e miembronan di e Comite Ehecutivo.
Pa mas lesa TREMPAN.
