Enconexion cu e ASU Olimpiada 2017, majan diasabra, Aruba Karate Bond lo organisa su campeonato nacional pa tur e scolnan di karate miembro di A.K.B den e Centro Deportivo Frans Figaroa na Noord.
Pa 9or di mainta lo cuminsa cu e diferente combatenan y esaki lo dura den oranan di atardi. Mas cu claro lo premira cu e combatenan den e diferente categorianan lo bay ta uno di nivel. Den e ultimo dos anja y mei, e deporte di karate a haya su acohida y ta gosa den un popularidad enorme. Mirando e popularidad di e deporte bou di nos hobennan, Aruba a conoce varios Dojo nobo unda nos muchanan por praktica e deporte di arte martial aki. Pa menciona algun nos tin Dojo Gyoseki Kan Tamashi Aruba, Dojo Shoshinkai Shotokan Karate Do, Karate-Do Ryubo-Kai, Dojo Shibumi, Dojo Shocokan y Dojo Budokan. Na varios ocasion, Aruba Karate Bond y su atletanan a representa Aruba den exterior y cu exito. Den e ultimo Caribbbean Karate Championship teni na Surnam nos atletanan a conkista no menos cu 9 medaya, un muestra cu nos tin potencial.
Dos luna atras, e hobennan Catherine Carraha, Robert Silva y Kevin Lugo a bringa den e competencia di nivel di mas halto den e continente America, esta Panamericano di Karate na Buenos Aires unda nan a duna bon bataya contra e mihonan. Un danki sigur na Lotto, e Loteria di Aruba pa medio di Comision di Subsidio cu a subsidia e competencia di karate Aruba Karate Championship enconexion cu e ASU Olimpiada 2017. Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
