Fuera di e ministernan di por lo menos cuater parlamentario cu e siman aki ta na Hulanda pa atende diferente reunion, un delegacion di Parlamento di Aruba tambe a biaha pa Brussels, n’e pais Europeo bisiña, Belgica pa atende e Euro-Latin American Parliamentary Assembly of Euro-Lat. Aruba ta representa pa president di parlamento, mr. Edgard Vrolijk, hunto cu griffier Herman Hek entre 30 di november pa 2 di december. 24ora.com a entrevista mr. Vrolijk pa conoce mas di e obhetivo di nan presencia y participacion den e encuentro.
El a splica cu e asamblea ta conta cu 150 miembro di Latinoamerica y Europa cu e meta di vocifera y dialoga riba tema di interes comun. Entre e temanan cu mr. Vrolijk a duna como ehempel tin e fortalecemento di prioridadnan politico, ratifica acuerdo comercial existente y transicion climatico. Adicionalmente a papia di e transformacion digital, pero husto; un crecemento economico sin desigualdad.
Topico cu atendiendo durante e dianan aki ta e promocion di democracia y derecho humano. Democracia, por ehempel ta den un recesion caminda tin un lucha formal den cual e elemento esencial cu ta stimula esaki ta prensa. “Prensa mester por trece noticia al caso y informa pueblo debidamente. A uza e palabra fake news hopi y ta creando hopi division den comunidad y hende ta kere cu democracia ta bayendo malo caminda no ta’sina,” e president di Parlamento a expresa.
Riba e di dos dia, mr. Vrolijk a atende un reunion di comision social pa hoben y mucha, como audiencia ya cu e no ta miembro di dje, pero ta un topico di su interes. Mr. Vrolijk mas bien ta den e comision social economico, comercial y financiero. El a splica cu un di e topiconan tabata reforma di educacion post covid caminda mester di digitalisacion, inclusion, pero tambe cuido di docente. “No solamente crea infrastructura y acceso, pero tambe e importancia di lenga materno. Den e caso di Aruba, ainda no a tuma decision di kico ta e prome y di dos idioma, mientras cu aki ta papia di Lenga materno y un di dos idioma. Nos ta hopi atras,” e parlamenetario a expresa.
Pa e relato completo, lesa edicion di TREMPAN
