Rond di ocho mil studiante di scol secundario rond mundo a participa den e National High School Model United Nations (NHSMUN) na New York. Esaki ta e competencia di mas grandi, mas diverso y bieu di Model United Nations (MUN) p’e studiantenan di scol secundario, unda cu e studiantenan di 80 pais rond mundo ta bini hunto e luna aki pa competi representando nan delegacion y pais.
Aruba a sobresali den e competencia aki y a regresa cas cu premio di excelencia pa e delegacion, premio di merito den UNICEF Committee y premio den excelencia pa UNTOC. Tabata un grupo chikito di studiante di Aruba cu a competi entre como 4 mil studiante. Maria Teresa Rodriguez, studiante na International School of Aruba a bisa cu nan tabata ta na New York pa shete dia y na nan yegada nan a reuni, pa asina nan pone den practica tur loke nan a siña den e ultimo seis lunanan.
Tambe nan tabata tin e oportunidad pa siña conoce otro hende, debati y sigur un gran experiencia. Maria Teresa a atende e Convencion di Nacionnan Uni contra Crimen di Organisacionnan Transatlantico, unda cu nan tabata tin e oportunidad di trata e topiconan manera politica nacional, division regional, educacion riba crimen cibernetico. Hunto cu Rebecca Irausquin tabata tin e honor di gana e di dos luga den nan comision mientras cu Marie Louise Lopez a gana di tres luga den su comite.
Na final, nan tabata tin un ceremonia di clausura caminda cu Maria Teresa hunto cu Rebecca a wordo scogi pa papia dilanti di cuater mil persona, unda cu nan mester a duna un poco di introduccion di tur loke a papia y debati den nan comision, tocante e solucionnan y idea cu nan grupo a bin cu ne.
Pa prome biaha un delegacion di Aruba a participa n’e NHSMUN. Nan tur a participa den diferente conferencia y debate, unda a representa nan pais Croacia. Aki a debati riba e echo di busca solucion p’e pais. Nan obhetivo tabata lucha contra insiguridad, pa tin siguridad pa mucha y combati analfabetismo (illiteracy) bou di mucha.
Segun e studiantenan, tur studiantenan mester tin e oportunidad pa asina participa na e conferencia aki. No ta bay pa gana, pero e experiencia cu bo ta haya, e oportunidad di pone den practica tur loke bo a siña. E ta un satisfaccion grandi pa wak ken bo tabata ta prome y ken bo ta awo, cual ta un diferencia hopi grandi.
E studiantenan ta yega Aruba diamars merdia for di New York, riba un vuelo di Delta Airlines. Mester menciona cu Marie-Louise Lopez ta yiu muhe di lider di partido MAS, actual miembro di Parlamento di Aruba, drs. Marisol Lopez-Tromp.
Por ultimo, Rodriguez a bisa cu e biahe aki tabata uno cu nan lo keda recorda pa semper.
