Elliott Loonstra, un atleta di Para Taekwondo, a yega triunfante Aruba despues di su participacion den “Los VII Juegos Para Panamericanos” na Chile. Cu un medaya di brons colga na su pecho el a baha for di avion diasabra atardi unda un grupo grandi di persona a ricibi’e.
Loonstra a participa den tres pelea y na final el a keda cu medaya di brons. Esaki ta e prome medaya cu Aruba ta logra den su participacion den e Para Weganan Panamericano y e ta den e categoria di e disciplina di Taekwondo. “Mi ta hopi contento cu e resultado aki y feliz cu e medaya.”
Prome cu el a biaha pa Chile, Loonstra a pasa den diferente sesion di entrenamento cu por a yud’e ta mental y fisicamente prepara pa un competencia grandi manera esun di Weganan Panamericano. Na Argentina durante dos siman largo coachnan a traha riba mehora su tecnica. “El a yuda mi hopi si mira mi peleanan di pasado y esunnan cu mi a bringa na Chile.”
Elliott Loonstra tin seis aña preparando su mes riba e tereno aki, durante cual el a bringa pelea internacional na Latino America pero tambe na paisnan leu manera Hapon. “Hopi experiencia mi a acumula.”
E entrenamentonan ta pisa, el a conta. E ta train cinco dia pa siman, tin biaha dos bes pa dia, cu entre otro peso. E ta un disciplina cu mester mantene, traha duro riba dje y den esaki el a haya hopi apoyo di su team durante e ultimo seis añanan.
E ta conseha tur hoben den mesun situacion cu ne, lucha pa logra metanan poni. “Purba, bo no tin nada di perde. Y e por trece hopi exito.”
Na aeropuerto tabata presente un grupo di fanaticonan di dje. Por a mira Glenda Thomasia, kende ta presidente di Aruba Paralympic Committee. “Nos ta hopi orguyoso pa ricibi nos atleta cu a gana pa prome biaha den historia di Aruba den e wega paralimpico e medaya di brons. E ta un medaya cu ta nifica masha hopi pa nos, pasobra e ta comienso di un era pa nos den paralimpico.”
E presidente di e organisacion local ta sinti cu e resultado aki tabata e boost cu tabatin mester pa motibo cu na Aruba tin hopi mucha y hoben cu por participa den e weganan aki. “Ta habri hopi porta, mayornan por manda nan yiunan pa competi den un disciplina. E training ta bon pa e muchanan y pa nan salud. Ban pusha y manda nos yiunan pa nan desaroya sanamente,” Thomasia a bisa.
Panamericano
E Weganan Panamericano pa atletanan cu un descapacidad a tuma luga e aña;ki na Chile for di 17 pa 26 di november.
Weganan Parapanamericanos ta eventonan deportivo pa atletanan cu discapacidad di e continente Americano. A cuminsa organisa e categoria aki na 1967 na Winnipeg cu e nomber di Weganan Panamericano pa Parapléjico.
Na 1999 a organisa e evento pa prome bes door di Comité Paralímpico de las Américas, cu apoyo di Comite Paralimpico Internacional, na Mexico, bou di e nomber Weganan Parapanamericano. For di e tempo ey e competencianan ta tuma luga inmediatamente despues di Weganan Panamericano y, desde e edicion di 2007, den e mesun ciudad.
