Arturo Vallejo di partido MEP lo huramenta diahuebs como parlamentario. E ta un di e prospectonan hoben cu ta hopi prometedor. Pa loke ta su expectativanan, e ta conta cu esaki tabata un oportunidad nobo y ta supremamente gradicido na tur esunnan cu a apoy’e den su trayectorio politico y ta un honor pa sirbi pais Aruba.
Pa loke ta emocionnan ta halto y debi na e honor, mester bay traha pa pais Aruba, cual ta un hecho bunita. Vallejo ta cla p’e reto.
Vallejo a sigui bisa cu semper un parlamentario tin iniciativa propio. Ta importante pa e por eherce esaki. Pero sigur e cargo ehecutivo ta esun cu ta haci mas decision. Parlamento ta hunga un rol di control. Den tur dos banda ta importante pa tin apoyo di e partido, apoyo di henter e parlamento pa por haci e decisionnan y traha pa e bon comun di Aruba.
Pa un eventual coalicion, Vallejo a comenta cu definitivamente desde un inicio tabata enfoca pa sirbi pais Aruba. Si ta parlamentario of minister, siguramente lo ta contento cu ne. Ta honra pa tin e oportunidad y lo mira kico ta bay pasa den e siguiente dianan.
