E record label “Malak Records” di renombre, a duna di conoce awe den un comunicado cu un di e artistanan cu ta cay bou di nan esta Airon Music, ta trahando ariba un single hunto cu e tan conoci artista Cristian urbano “El Philippe”. E proyecto aki ta algo cu nan ta trahando duro pa sali cuminsamento di aña 2022.
Directiva di Malak Records a informa tambe cu esaki lo ta un tremendo oportunidad pa Aruba haya e reconocemento internacional den e plataformanan di musica Cristian, mirando cu “El Philippe” ta un artista hopi conoci cu canticanan manera “No religion” cu a hit 17miyon views riba YouTube, como tambe hunto cu Redimid2, Nathan, y Rubinsky RBK a colabora pa traha e cantica “Trapstorno” cu mas di 100miyon di views.
“El Philippe” ta un artista di Republica Dominicana cu a sa di mantene su mes den e topnan di e artistanan urbano, haciendo featurings den pasado cu artista manera Redimi2, Nathan el profeta, Rubinsky RBK entre otro. Di su banda, Aironmusic ta un artista local cu pa mas cu 14 aña den farandula, a sa di keda den e mundo di e music urbano gospel, haciendo esaki un manera pa hiba e mensahe di Cristo Hesus.
Malak a comparti tambe cu nos, cu e plannan ta grandi y cu pronto “El Philippe” lo bin nos isla pa e grabacion di e video oficial di e single aki, uzando e bunitesa di nos isla como un ‘add on’ importante na e video aki.
Ta pidi e comunidad pa keda pendiente pa cualkier otro informacion di e banda y ta desea tur clase di exito na Airon Music y El Philippe cu e tremendo trabouw aki.
