Arthur Dowers di AVP no por compronde con hende grandi por hinca den nan cabes cu ta bay, behalve cu e ta papia crisis, minister ta riba crucero, ta balia Carnaval y no ta traha. Y awor aki gobierno ta bay ocupa Banco Central tambe pa manda un carta caminda ta bisa cu un grafico cu Mike Eman a presenta, no ta di Banco Central.
E no ta bay pa grafico, sino pa contenido.
Si tin un borchi cu ta bisa cu tanto accidente tin, no ta di Cuerpo Policial, pero e informacion ta cuadra si cu esun di Cuerpo Policial. Mester grow up.
Ora cu politiconan y sigur gobernantenan cuminsa cay na e nivel aki, esey ta bisa cu cos ta hopi berans awor aki. Nan ta hopi spanta pasobra nan no tin argumento. Nan ta mira cu loke nan ta haciendo no ta duna resultado, pasobra nan ta creando caos den e pais aki. Pueblo ta cuminsa sinti cu e priki cu ta papia di dje, ta haci un tiki dolor, ta haciendo hopi dolor.
Hopi hende a cuminsa sinti’e y awor aki tin cu mira con nan por manipula cu cifra.
Den e siman cu ta bin ta bay duna mas informacion, unda cu nan ta manipula cu papiamento y presentacion di otro hendenan. Poco poco e pueblo mes lo bay compronde.
Logicamente tin algun fanatico cu tin cu presenta cierto cosnan pa nan por papia. Pero realidad ta cu mayoria hende ta compronde e wega cu ta wordo haci door di e politiconan.
Un otro ehempel ta cu ta papiando di e gobierno cu ta gusta bruha tera. Tin un minister presidente a sali bisa cu e no kier hay’e den un potret cu hendenan cu ta massamoordenaars.
E tabata riba potret cu tur sorto criminal, pero no kier ta riba potret cu hendenan cu ta mata mas cu un hende.
Aki ta desacredita e minister di Asuntonan exterior di Hulanda pasobra el a cera un acuerdo cu un hende cu segun bo, ta un massamoordenaar.
Dowers ta puntra su mes, ora cu e minister aki a sali bisa cu ta gañamento pasobra cu e ta di acuerdo cu e acuerdo cu a cera.
Ta e mesun acuerdo cu a sinta na mesa cu tur e hendenan cu a acusa di ta criminal y cu nan a yega na e acuerdo aki, awor cu a wordo firma p’e, e ta distancia su mes.
E ta haci esaki pa politica local. Kier crea un esfera caminda cu e ta bisa cu e ta hende drechi, hende nechi, no kier wordo mira den potret cu massamoordenaar.
Un hende cu ta criminal, ta criminal e ta. Ora haci tipo di cosnan asina, ta mustra cu ta purbando di haci un hende bobo.
Si un presidente di un pais cu a mata hende, tin instancia cu ta atende cun’e mester haci esey.
Pero lo yega un momento cu e prome minister mester atende cune,. Hasta loke e haci por bira un menasa pa pueblo. E ora e prome minister mester para firme pa defende su pueblo.
Mester ta conciente. Esaki ta un grupo di hende cu ta tuma pueblo haci y lamentablemente tin algun hende cu a cay den nan wega.
Loke ta punto di bista di AVP cu informacionnan cu a wordo duna ta corecto y lo ripiti un biaha mas, pa pueblo haya mas informacion y compronde bon kico ta pasando.
E meta principal di nan pa manda pidi pa carta of pa duna cierto informacionnan, ta simplemente pa tapa e realidad. Pa kita e distruccion for di e riba e contenido y mira si por gana un bataya cu no tin sentido di trocemento di palabra.
Esey no ta e discucion. Discusion ta si ta berdad si of no, cu e contenido di informacion cu sr. Eman a duna, ta corecto, cual ta asina y tambe ta poni den e presentacion di sr. Eman, cu e caminda cu el a haya informacion, cu ta hinca den henter su presentacion, ta bin di Banco Central.
Pesey banco Central no a desmenti y no por desmenti tampoco, pasobra e ta riba nan website.
