Jennifer Arends-Reyes ta un parlamentario saliente y a sirbi parlamento pa varios aña. Diaranson el a tuma su despedida. E la comenta di ta sumamente agradecido pa e oportunidad. Politica no ta facil, sinembargo el a conta cu durante dos periodo di parlamento e por a duna su contribucion, vooral na e parti di enseñansa y turismo, caminda cu e por a wak bek na contribucionnan grandi durante pandemia, cu por a haya vooral e parti di enseñansa a sufri hopi.
Eynan por a boga pa un miho enseñansa tambe. Arends-Reyes a comenta cu e ta sinti cu el a haci un bon papel den parlamento, deseando asina parlamento nr. 11 hopi exito.
Michael Lampe a fungi como parlamentario fo’i 2017. Lampe ta un musico y a fungi como un parlamentario cu tabatin e interes den e parti di cultura, pero tambe sector turismo. Lampe a dispidi pa loke ta e constelacion actual.
Awo e ta bayendo pa un otro etapa. Sinembargo e emocionnan tabata halto di a tuma e despedida. Lampe a indica di ta un honor di a sirbi Aruba y representa comunidad for di parlamento. E ta gradici na tur esunnan cu den e periodo aki tabata parti di e experiencia aki y a yud’e den e formacion como politico, pero tambe den e trabao como parlamentario.
Cu un curason contento el a dispidi di e trabao como parlamentario pero ta keda traha manera semper. Den prome cu politica e tabata traha pa e sector creativo y pa e hobennan creando oportunidadnan nobo tanto na Aruba como den exterior, cual e lo keda haci. Pa Lampe tabata un periodo cu a siña hopi y tambe a mira hopi unda cu tin oportunidadnan netamente pa hiba un politica di nivel.
E lo sirbi politica riba un tono mas personal.
