Miembro di Parlamento di Aruba, Aquannette A. Gunn, den representacion di e Fraccion di MAS, a dirigi un lista di pregunta na e minister encarga cu e cartera di Labor, Energia y Integracion, Glenbert Croes, conforme articulo III.7 di Areglo di Estado juncto articulo 59 di Reglamento di Ordo di Parlamento di Aruba. Ta trata di preguntanan relaciona cu su maneho di energia, cu segun e parlamentario, ta contradictorio y hasta conflictivo, si analisa cuanto NDA y MOU e ta firmando tras di otro, sin informa Parlamento ni pueblo di Aruba di kico e ta haciendo.
“Riba dia 26 di october 2022 mi a dirigi diescuater pregunta na Minister di Energia, Glenbert Croes relaciona cu biahenan di trabou pa Washington y Ecuador y tambe ‘hedging. Mi persona a manda e mandatario 5 recordatorio (rappel). E ultimo a keda manda riba 5 di mei 2023 y te dia di awe e mandatario no a sa di cumpli cu su deber di contesta e preguntanan”, asina e miembro di Parlamento di Aruba ta skirbi den un carta cu un tono poco mas disgusta.
“Ta un secreto publico cu e mandatario di Energia a haci diferente biahe pa asina, segun su version, sondea e miho maneho di energia pa Aruba. Na mas di un ocasion el a bishita Washington, Ecuador, Hulanda y Spaña. Den e edicion di 30 di augustus di Diario, pagina 6 a ser publica cu Aruba y Acciona Energia a firma un MOU pa desaroyo di un Green Hydrogen Valley”, segun Aquannette Gun ta corda.
Pero mas leu den su carta, e ta skirbi cu “Considerando cu Gobierno di Aruba riba 9 di december 2021 (e firmamento simbolico, pues esaki a keda firma prome caba) a cera un contract (NDA) cu Eagle LNG pa un termino di 20 aña. Durante e encuentro publico di dia 13 di december 2021, Sean Lalani a duna di conoce cu na inicio di aña 2022 e inversionnan lo inicia pa loke ta e construccion di e facilidadnan pa abastece e gas natural. E mandatario a enfatisa cu dicho construccion di e infrastructura lo suma 2 aña y cu esaki mester keda cla prome cu 2024. Saliendo for di e punto di bista cu nos ta den e ultimo luna di e di tercer cuartal di 2023 y te ainda nada, pero nada a inicia pa loke ta construccion di e facilidadnan y e tuberia cu mester keda instala for di e tereno di RDA pa WEB Aruba NV y e MOU cu a keda firma recientemente cu Acciona Energía ta trece mas confusion ainda”.
Den cuadro di haya claridad pa loke ta trata e maneho di energia Parlamentario Aquannette Gun kier pa minister informa Parlamento si e Environmental Studies di Eagle LNG a keda concretisa. Pasobra conforme e director di Desaroyo di Eagle LNG, Alejandro Bastardo, esaki lo a keda finalisa den e ultimo di cuartal di 2022. Si e contesta riba pregunta ta positivo, ta pidi minister pa comparti dicho estudio cu Parlamento. Sino kier sa kico ta e motibo (nan) cu dicho estudio no ta cla ainda. E parlamentario lo kier sa e ora pa ki tempo ta premira cu e estudio aki lo finalisa.
Mas leu e miembro di parlamento ta corda di a lesa den prensa na januari 2022 y durante di e reunionnan publico na december 2021, cu minister a bisa enfaticamente cu e infrastructura di e distribucion di gas likido mester keda cla prome cu 2024 y cu na 2024 lo inicia cu e transicion. Pesey e kier sa awo si Minister Glenbert Croes lo por elabora den detaye dicon e trabounan di construccion di e facilidadnan te dia di awe no a inicia. Ta cuestiona si acaso ta premira cu e trabounan di construccion di e facilidadnan y tuberia lo inicia prome cu aña 2023 finalisa ainda.
Fraccion di MAS ta puntra su mes si Minister Glenbert Croes ta consciente cu debi na e echo cu e trabounan tin un retraso inmenso di casi dos aña y cu esaki tin un repercusion directo pa e pueblo riba e tarifa di coriente y cu ta haci praticamente un reduccion imposibel den e prijs di coriente. P’esey e kier sa kico lo ta e plan di Goblerno pa esunnan mas vulnerabel den nos comunidad considerando cu e aumento di tarifa di coriente cu a keda introduci na augustus 2022 a conoce un reduccion minimo na mei 2023, pero ainda e porcentahe ta casi 17%.
Pa loke ta trata maneho di e compania nacional di produccion di awa y coriente, Aquannette Gun kier sa si WEB Aruba a hedge pa aña 2023 y na ki prijs a logra ‘hedge’ pa bari di HFO. Kier sa pa cuanto luna/aña. Y si no a hedge, e lo kier sa tambe kico porta e causa cu a opta pa no haci esaki.
Den otro asunto di energia, na maart 2023 Minister Glenbert Croes a informa cu Eagle LNG lo forma parti di Green Hydrogen Valley. Gunn ta puntra e ora na ki forma y di ki magnitud Eagle LNG lo ta parti di e Green Hydrogen Valley. Pasobra ta conoci cu WEB a firma un NDA cu Eagle LNG, pues no por divulga nada di nan acuerdo cu ningun otro compania. Ta puntra si tin un multa mara na e contract si un di e partidonan no cumpli cu loke ta stipula den e contract. Kier sa kico ta e suma di e multa.
Riba e website di Eagle LNG Aruba, den un comunicado manda na januari 2021, ta papia di a firma un acuerdo exclusivo pa facilidad di gas likido pa Aruba. Mientrastanto, den e rueda di prensa di e mandatario na maart 2023, e ta indica cu Eagle LNG por produci e asina yama blue hydrogen, pero cu finalmente e meta ta pa vega na green hydrogen. Tanto minister como Sean Lalani a indica cu Eagle LNG lo abastece e terminal cu gas likido natural y esaki lo ser manda via tuberia pa WEB Aruba NV. Pesey, ta puntra awo si den e contract (NDA) cu Eagle LNG tin stipula cu nan lo percura pa e produccion di e blue hydrogen.
Ta bin acerca cu, separa di Eagle LNG cu supuestamente mester ta basta leu pa cuminsa abastece gas pa Aruba, cu diripiente Minister Glenbert Croes a firma un MOU entre Aruba y Acciona Energía pa cu desaroyo di un green hydrogen valley. Parlamento kier haya un copia di e MOU firma, pa nan por saca afo ta pa cuanto aña Gobierno di Aruba tin pensa di concretisa e memorandum di acuerdo cu Acciona Energía pa traha hunto cu e companianan di energia cu ta pertenece na Gobierno pa asina desaroya, construi y opera e planta di green hydrogen. Tambe nan lo kier sa ki implicacion financiero e deal cu Acciona Energía lo tin pa Pais Aruba.
Finalmente Aquannette Gunn kier pa Minister Glenbert Croes splica dicon den e MOU no a añadi e colaboracion cu lo tin entre e dos companianan, Eagle LNG y Acciona Energía, considerando cu ambos lo opera riba e mesun tereno. E miembro di parlamento ta sinti cu e maneho ta contradictorio y por causa conflicto entre e dos companianan aki. Tin ora ta parce cu e mandatario ta purba shen cos pareu y na final ningun ta concretisa pasobra esun ta stroba e otro. E echo cu e minister deliberadamente ta keda sin contesta preguntanan di e parlamentario, tin e indigna, pa cual e ta urgi gobierno pa no keda sin contesta e organo mas halto di nos pais.
