Seccion Examenbureau di Departamento di Enseñansa Aruba ta informa cu e di dos ronda di
inscripcion pa e Prueba di Naturalisacion (Naturalisatietoets) pa aña 2019 ta habri desde
dialuna dia 29 di juli te cu diabierna dia 16 di augustus 2019.
Pa aplica pa e Prueba di Naturalisacion mester haci uzo di e formulario di aplicacion cu ta
obtenibel riba e website Enseñansa Aruba www.ea.aw. Hunto cu e formulario di aplicacion mester entrega copia di algun documento. E persona cu ta aplica mes mester percura pa saca e copianan, incluso di e formulario di aplicacion, y entrega tur hunto pa e inscripcion por tuma luga. Tambe mester trece e documentonan original pa e copianan por wordo verifica.
Riba e website Enseñansa Aruba www.ea.aw por haya un Foyeto di Informacion cu tur
informacion necesario.
E Prueba di Naturalisacion ta tuma luga dos biaha pa aña. E prome ronda di inscripcion ta tuma luga na luna di Januari, mientras cu e di dos ronda ta tuma luga na luna di Augustus.
Prueba di Naturalisacion desde 1 di januari 2011 ta consisti di 1 componente di conocemento
di nos comunidad y structura estatal, 4 componente di idioma Papiamento y 4 componente di
idioma Hulandes. Departamento di Enseñansa Aruba pa medio di su Examenbureau ta encarga specificamente cu e prueba y no tin ningun participacion den henter e proceso di naturalisacion.
Pa informacion relaciona cu e Prueba di Naturalisacion por tuma contacto cu Examenbureau,
mientras cu pa naturalisacion mester tuma contacto cu Gabinete di Gobernador di Aruba.
Pa mas informacion por acudi na website www.ea.aw y busca Naturalisatietoets of Prueba di
Naturalisacion den e alfabet menu. Tambe por sigui e desaroyonan a traves di facebook page
@educationaruba.
