E siman aki e noticia tristo a drenta cu e gran baluarte musical, Felix ‘Chucho’ Hoek a bay sosega despues di un bataya duro contra di e malesa di cancer.
Carlos Bislip Jr hunto c’un grupo di amigo y coleganan a bin hunto pa asina recorda nan amigo y colega, cu kende nan a traha pa varios aña. E mes a conoce Chucho na 1981, ora cu el a caba su prome aña na Berkeley College of Music y a bin pasa su vakantie na Aruba. Y despues di un aña Chucho tambe a bay studia n’e Berkeley College of Music. Y na Berkeley nan a topa cu otro como studiante y di eynan el a cerca conoce Chucho mas di cerca.
Despues di tempo nan a topa bek na Aruba. ta hopi anecdota e por corda cu e tabata tin Chucho . Carlos tabata bisa cu e cu Chucho ta di e ‘Vieja Guardia’, esunnan cu mas tempo na Scol di Musica.
Como director di Scol di Musica, Chucho tabata un persona hopi straight y hopi impecabel como director. Tabata un par di biaha cu nan tabata por a traha hunto den algun proyecto.
Chucho tabata tin un otro approach cu musica, e tabata tin su forma y firma den e mundo musical di Aruba.
Carlos a sigui bisa cu tempo cu Chucho a caba MTS ya caba nan no tabata duna beca pa bay studia musica, pero door cu e tabata e miho graduado di e tempo ey, e tabata por a bay studia kico e tabata kier, pero el a bay studia musica. Den su composicionnan por ripara cu nan tin hopi conexion cu otro y e tin un forma.
Awo cu e no t’ey mas, lo haya su falta masha hopi. E momento cu nan a haya noticia di su fayecimento, e ambiente a bira hopi pisa. E tabata un persona hopi bon organisa pa cu su responsabilidadnan.
Na ultimo, Carlos Bislip a bisa cu Chucho tabata un hopi preciso, un persona perfeccionista.
Un otro artista cu a traha hopi di cerca cu Chucho tabata e cantante local Sasha Figueroa. El a conoce Chucho tempo cu e tabata mucha caba, pero ora cu ora cu Chucho a compone e cancionnan ‘Ay, esta dushi’, ‘Maske ta un biaha’ y ‘Mi rehen’ e ora Sasha a cera mas cu ne.
Tambe Chucho a yega di compone un cantica di Pasco pa Sasha su yiu muhe Micah. Pero tambe Chucho tabata compositor di diferente artista na Aruba.
Pero Chucho a scoge Sasha pa a canta e canticanan cu el a compone cu tabata tin un tiki mas sazon, manera nan ta bisa, un tiki mas picardia. No ta tur hende ta durf di canta sorto di canticanan asina y Chucho a wak un potencial den dje, pa cual semper e tabata compone cierto cancionnan di picardia pa Sashah canta.
Si Sashah lo keda gradicido pa semper na Chucho pa a yud’e den su carera musical; el a siña hopi di dje.
Como compositor, Chucho tabata un persona hopi intensivo . E tabata compone su canticanan c’un cierto ideanan den su cabes y tabata tin e pasenshi pa splica e interprete kico tabata su intencion cu e canticanan.
Chucho tabata un homber semper keto, un persona trankil. Pero su cancionnan ta papia pa su mes.
Sashah lo describi Chucho como un artista completo y mundo farandulero lo haya falta di su conseho-y composicionnan, su melodia.
Tambe Sashah tabata kier a gradici Chucho pa tur loke Chucho a haci p’e den su carera.
Un otro profesional cu tambe a traha hopi di cerca cu Chucho ta e gran musico, Ivan Quandus.
Ivan ta recorda cu e prome biaha cu el a traha cu Chucho den un proyecto tabata tempo di Orquesta Quasi, tempo cu Richard ‘Tattoo’ Quandt ta forma parti di e grupo aki. Nan tabata tin composicionnan cu cual nan tabata bay Calypso & Roadmarch y despues graba un album completo, manera tabata haci antes.
Pa Ivan, Chucho Hoek tabata esun cu a revoluciona e mundo musical di e genero di Roadmarch, cu a cambia henter e estilo di aregla pa Roadmarch.
Ivan y Chucho a traha den varios proyecto, manera tempo di e canal di television di ATV, nan jingle di fin di aña, hopi di nan tabata componi pa Chucho. Loke semper a resalta di Chucho tabata cu e conscientemente e sa cu tin hopi bon guitarista y te hasta miho cu ne. Pero su composicionnan semper tabata resalta y por a mira e resultadonan di e cancionnan exitoso, manera ‘Yen di Energia’ di Edjean Semeleer, Sashah Figueroa cu Tsunami y bay bek tempo di Ramphys Tromp y Tattoo Quandt.
Si Chucho tabata un persona hopi exigente den su trabou, tur locual e tabata tin skirbi, asina e tabata kier pa e cancion cana. E tabata un compositor/areglista apart. El a crea su estilo den su forma di compone y aregla. E tabata un compositor hopi peculiar!
Chucho ta bay haci hopi falta. Musica a bira hopi simpel, a perde hopi creatividad siendo cu Chucho tabata pensa riba tur e posibilidadnan di crea den mundo di musica y esey ta e perdida grandi den e mundo di farandula di Aruba. Falta lo haya di dje sigur!
Ivan Quandus como mensahe a bisa cu Aruba a perde un gran musico, un gran artista. Pero mester sigui mantene su idealnan bibo den e mundo di musica di Aruba.
Cu Chucho sosega na paz!
