Robert Beukenboom a bini for di Boneiro recientemente pa celebra cu 50 aña pasa un grupo di Boneriano a bini Aruba pa sirbi den servicio militar obligatorio.
Antes den Antias e hendenan di Boneiro tabata bin Savaneta Camp pa sirbi 1 aña di servicio militar obligatorio. Tur aña e di tres grupo (Lichting) ta join hunto cu e Arubianonan, join Savaneta Camp pa pasa un opleiding y despues keda sirbi pa 1 aña. Tin cu ta keda y bay pa otro opleiding, pero tin di nan ta keda manera militar y despues di 1 aña bay bek nan isla.
Como tal, recientemente e grupo di militar di Boneiro a bin Aruba pa hunto cu amigonan di aña 1973, dus 50 aña pasa, pa celebra e parti militar pero bida tambe. “Durante e 50 aña aki tin hopi amigo y compañero di nos den servicio militar cu a bay laga nos y sosega, pero tin tambe cu ta sufri di kebrante di salud y como tal nos a bin celebra bida. Pero tambe pa yama danki n’e pueblo Arubano y tur cu a ricibi nos na nan cas pa un aña.”
Beukenboom ta expresa cu si lo a bini un conflicto manera durante tempo di Lago, si algo lo a bay fout, e Boneriano lo tabata dispuesto na proteha Aruba y su interes apesar cu no ta nan isla.
E tempo ey e grupo tabata un di esunnan di mas grandi. Un total di 11 Boneriano a join cu 9 Arubiano pa bira un grupo di 20 hende. Normalmente tabata bin algun hende di Boneiro so, entre 5 pa 7 hende, pero e tempo aki tabata 11 Boneriano cual toch tabata hopi. “Nos aworaki a topa e coleganan pa recorda e cosnan placentero y cosnan menos placentero tambe, pero claro cu tabata tremendo.”
HOPI CAMBIO DEN MUNDO MILITAR
Beukenboom ta comparti cu berdaderamente a bini hopi cambio den e ultimo temponan compara cu ora el a start den mundo militar. A bini hopi arma letal, arma kimico, guera a bira mas sushi tambe. Tin arma cu no ta importa con bon soldaat bo ta, e miho arma of mas destructivo ta haci mas daño. “Awendia cu e armanan cu tin mi no ta kere tin ganado, ta perdedo so tin.”
Pero claro, e mundo militar ta yuda bo hopi cu disciplina. Bo tin cu tuma ordo, ehecuta ordo sin mucho pregunta of mucho biramento. Pero no tin servicio militar obligatorio mas tampoco. Tanto na Corsou cu Aruba cu ta e pais autonomo, tin un sistema di militar pero no manera antes segun Beukenboom. E palabra mes ta bisa bo, e tabata servicio militar obligatorio.
Si bo no bay, bo ta haya castigo di prizon. Tur hoben cu cumpli 18 aña tabata pasa via un test mental y fisico, pa despues bay den servicio militar obligatorio. Awendia esey y masha hopi cos ta diferente na varios parti di mundo tambe.
Aruba y Boneiro ta refleha dos isla ruman cu den un parti largo di nos pais Antias antes a comparti militarismo cu otro. E programa di recorda 50 aña di Arumil tabata hopi bunita hinca den otro cu diferente actividad, bishita na Kazerne cual no ta esun di 50 aña pasa mas tampoco.
