“Mi no a haci e polis nada. E tin un teima cu mi”, asina Jaime Loaiza, encarga cu maneho y operacion di American Bar na San Nicolas a bisa awe. E ta referi na e sucedido di diasabra anochi, ora cu polis a drenta pa un control den su establecimento. A dicidi cu, debi cu e no ta cumpli cu reglanan di Covid-19 ni di higiena den su cushina, cu e mester cera mesora.
A dun’e dos dia obligatoriamente cera, te ora cu Departamento di Salud Publico (DVG) controla y dun’e OK pa e por habri bek, ora e corigi tur e fayonan.
Ora polis a drenta anochi den e bar, nan a constata cu no tabatin hand sanitizer na e luga indica. E doño a splica e polis cu e tin’e riba e bar poni pero a splic’e cu no ta eynan e mester ta, sino banda di e porta di entrada caba. Riba dje, ora a drenta den e cushina, a topa cu cosnan sin laba y daña. E doño a sigura awe cu locual e polis a bisa no ta berdad pasobra ta cosnan fresco y cu net e tabata pa bay laba nan. No tabatin lechi bieu ni nada cu e polis a bisa di a constata.
Jaime Loaiza ta sinti cu, a pesar cu situacion ta dificil y bar/restaurantnan ta purbando pa sobrebibi e mal tempo aki, cu polisnan na otro banda ta busca tur forma pa perhudica nan y caba di saca nan for di negoshi. For di momento cu e polis a drenta paden, el a bis’e di lo busca algo pa por cera su luga, pa cual e comerciante ta sinti cu ta algo personal tin. El a sigura cu su bar ta cumpli cu tur regla di DVG y cu su cushina ta limpi limpi.
Loaiza ta convenci cu dialuna ora DVG pasa controla, cu nan lo dun’e OK pa habri atrobe pa por sigui ofrece servicio di cuminda na tur su clientenan fiel.
