No ta mucho dia pasa cu a trata di e presupuesto pa aña 2024 di e ‘Hoog College van Staat’, Parlamento di Aruba. A trata un presupuesto caminda lo aloca fondo pa diferente proyecto. Entre nan, mas cu 6 miyon pa renoba y construi un edificio p’e bintiun parlamentarionan y mucho mas. Placa pa come, bisti, telefon y biahamento no a keda afo. Hasta tin como 18 mil florin presupuesta pa paga e parlamentarionan parkeer.
AruParking lo cobra un bon puch’i cen for di parlamento, kende na final ta placa di pueblo. Ainda mas cu lo paga 18 mil florin pa aña pa parkeer, tin algun parlamentario a protesta, pasobra nan no ta sinti nan mes sigur cu nan auto ta para “sam sam” cu esun dje pueblo parti dilanti e edificio di parlamento. Parce nan kier un area priva, cu siguridad special pa cuida nan auto.
Manera indica, e parti di biahamento no a keda afo. Diescuater parlamentario, incluyendo Alvin Molina di 257 voto, a vota na fabor pa gasta mas di mey miyon florin pa nan por biaha y conoce mundo. E suma exacto ta 595 mil florin. Tin cu bisa si, cu ta un suma cu no a crece pa e ultimo añanan. For di 2022, 2023 y awo pa 2024, e suma a keda mesun cos. Cu e mey miyon florin aki lo biaha pa Hulanda, paisnan den Caribe, Latino America y awo hasta a lanta un comision pa prepara biahenan pa Surnam y Washington, Dc.
Claro, ora e parlamentarionan biaha nan ta haya cen adicional pa paga hotel, pa come mainta, merdia y anochi. Sin lubida cu nan no ta move den trein of riba bais y tampoco ta hal’e na pia. Autonan sumamente luhoso y blinda ta busca nan pa hiba nan di un punto pa otro. Segun Molina, e suma di mas di mey florin p’e parlamentarionan biaha ta na su luga, no tin duda den esey mirando cu nan ta topa cu na coleganan y hunto ta bin cu idea pa leynan nobo etc. E ta parti di e trabou di un parlamentario.
Adicional Molina a comenta riba su perspectiva pa aña 2024. E lo sigui bringa y lucha pa e pueblo di San Nicolas, apart cu el a entrega un cantidad di mocion caba. Toch e ta sinti cu gobierno ta haci caso di su mocionnan pero no suficiente, e aña aki e ex-altoinspector di polis lo sigui pusha y controla su propio gobierno.
Tocante Alvin Molina
Alvin Molina ta naci na Aruba y tin 46 aña di edad. El a studia na Colegio Arubano VWO, a sigui pa su estudio na Nederlandse Politie Academie na Appeldoorn y a regresa Aruba pa bira inspector di polis. Entretanto el a cumpli 19 aña como polis, semper den un posicion di maneho y strategia. Den su prome salida, Alvin Molina a haya # 10 riba e lista di partido MEP. A participa den eleccion na aña 2021 y a logra no menos di 257 voto riba su nomber. Durante su campaña electoral, a dedica hopi atencion for di unda e mes ta bin, esta San Nicolas. Cu salida di Chris Romero for di lista, a bin espacio pa un politico nobo cu e conviccion pa trece cambio y di ta un bos pa e barionan pariba di brug. Awendia, e propio Chris Romero ta sospechoso di husticia.
