Pa via di mal maneho, ambtenaar mester perde tempo pa bringa caso den corte, asina Alvin Molina di fraccion di MEP a inicia bisando. Y no solamente tempo, pero tambe energia y hasta placa pa paga abogado. Esaki ta resulta den malcontento, demotivacion, disminucion di productividad y consecuentemente no ta ofrece un servicio optimal na pueblo di Aruba.
Den su añanan den Cuerpo Policial Aruba, e parlamentario a experencia hopi caso cu coleganan simplemente no ta ricibi e trato, e posicion huridico cu nan merece. Causa di esaki ta simplemente ta; mal maneho. Mal ‘personeelsmanagament’ den e departamentonan, mal maneho den DRH. Pa por drecha e situacion aki gobierno mester tuma pasonan necesario, para duro pa hefenan di departamentonan organisa nan ‘personeelszorg’ manera debe ser y pa DRH cuminsa haci locual a wordo diseña pa haci cu ta conseha hefenan di departamento y minister pa despues ehecuta locual e hefe- y ministernan dicidi cu ta necesario pa por sirbi pueblo di Aruba.
Mi mes tin basta tempo ta bisa caba cu bedrijfsvoering y specialmente ‘personeelsmanagement’ ta e parti primordial pa nos por drecha e servicio di gobierno. Hende cu ricibi locual nan merece lo ta mas productivo. Ta sumamente importante pa DRH ehecuta su rol como e autoridad riba ‘personeelsmanagement’ manera mester ta. Hefenan di departamento y minister ta dicidi kico mester pasa, DRH ta conseha y ta percura con ta realisa e maneho.
Ta basta aña caba cu ambtenaarnan no ta ricibi e trato cu nan merece, ta basta aña caba cu departamentonan no ta funcionando optimal pa via di esaki y ta basta aña pueblo di Aruba no ta ricibiendo e servicio optimal, mientras cu tin espacio pa drecha esaki. A bira tempo pa reorganisa ‘personeelsmanagement’ den ful gobierno. Esunnan cu no por carga e responsabilidad mester traha luga pa otronan por haci e trabou.
