Edward Robles ta Tecnico di Restauracion na Departamento di Monumento y e ta un di esnan cu ta yega na e muchanan di scol, den un proyecto di charla cu e departamento tin. El a conta cu nan a cuminsa for di Maart y a pasa algun scol caba rond di Aruba. Awor aki cu e aña escolar nobo, ainda nan ta bezig cu e scolnan. Te awor aki nan a bishita 8 scol. E ta un charla cu nan ta duna riba diaranson so. Si mira bon, ta tur siman ta un scol. Tin siman cu no por duna. Por ta tin actividad na scol mes, manera Kinderboekenweek. Ora cu esey pasa, nan ta sigui cu e charlanan.
Departamento di Monumento ta hopi satisfecho con e ta bayendo y con e reaccion di e scolnan. Ora cu yama e scolnan pa haci un afspraak, di biaha nan ta bay di acuerdo pa e charla. Tin biaha den un siman di tempo ta prik un datum pa e scol.
Robles ta contento pasobra e ora nan por sigui cu nan charla cu nan por caba cu tur e scolnan. Tur scol e ora ta haya un chens pa haya un charla.
Falta ainda mas of menos 28 scol pa pasa. Te cu awor aki tin cu bisa cu ta hopi satisfecho pasobra nan a target caba mas of menos un 1000 mucha, mirando cada scol den 4de, 5de, 6de, ta papia entre 100 y 130 mucha pa scol, cual pa e departamento ta hopi. Si por target e muchanan aki, ta haci nan conciente tambe riba nos monumentonan.
E muchanan ta haya hopi interesante. E preguntanan cu ta bin bek, ta mustra cu nan ta entusiasma y cu nan ta pone atencion den klas riba e charla. Ta haya hasta pregunta di e maestronan, cual ta preguntanan interesante tambe.
Tin cu educa e muchanan mas tambe riba nos monumentonan y esaki ta interesante door cu ta mira cu hopi mucha, den un manera ta gelink na un monumento. Por ta nan wela tin un cas di 100 aña bieu y ta biba aden. Ora cu trece esaki dilanti, nan ta entusiasma y splica cu nan tambe ta biba den un cas di antes y ta hopi great pa mira, segun Robles.
Duracion di un charla
E charla ta bay mas bien pa klas. Segun Edward Robles, ta purba di pone e 4denan hunto, 5denan hunto y tambe 6denan hunto. Tin scol tin un solo 4de, of 5de, e ora ta merge nan. Ta pone tin biaha tres klas hunto, depende con grandi e klasnan ta. E charla ta dura mas of menos 45 minuut. Si tin hopi pregunta, e por yega te cu 1 ora. Pero tambe ta depende con e interaccion cu e muchanan ta tambe. Tin caminda cu ta haya hopi pregunta y e ta rek un tiki pa 1 ora.
Informacionnan basico
Den e presentacionnan ta papia riba nos monumentonan, kico ta haci un monumento, kico ta e reglanan di monumento, pakico nos monumentonan ta importante. Ta papia tambe di diferente arkitectura cu tin. Con nos monumentonan a haya cierto estilo di arkitectura. Ta papia di diferente monumento cu tin, cu no ta solamente edificio, pero tambe nos estatua di Wilhelmina. Tambe tin nos grafnan di commandeur. Eseynan ta practicamente e temanan cu ta papia riba dje.
Contento y cla pa sigui
Robles a comenta cu tin scol caba cu ta yamanan constant. Si no a yama ainda, lo bay ta yamando den e simannan cu ta bin pa por fiha un fecha. Scolnan cu ta interesa, cu kier’e mas lihe, por yama tambe libremente, puntra pa Edward Robles y fiha un fecha di biaha pa por sigui riba dje.
