Diaranson mainta, alumnonan di Fatima College na Dakota a celebra Dia di Himno y Bandera cu un Carousel den e klasnan, cu presentacion di varios instancia.
Den e prome parti di e celebracion, segun cabesante di e scol Franklin Richardson, a hisa e bandera di Aruba, hunto cu algun alumno cu ta bay scout y un banda chikito, pa despues continua cu nan programa pa 9’or di mainta, cu e Carousel.
Tambe durante e prome parti parlamentario Hendrik Tevreden a habri e mainta hunto cu alumnonan.
Tabatin varios instancia cu a participa, entre otro DVG, Banco Central, Aruba Tourism Authority, Aruba Aloe Balm, Telefon pa Hubentud, Cuerpo Policial y tambe Roy Sneek treciendo e parti di musica dilanti. Tabata un interaccion di 25 minuut den cada klas durante 7 lesuur, dedica completamente na Himno y Bandera y tambe e di 61 aniversario di Fatima College.
Pa loke ta trata Cuerpo Policial, segun vocero Lito Lacle, nan ta dunando charla sigur desde 2019 y 2020, aunke e ultimo aki no tabata por a sigui, debi na e pandemia. Tambe Lacle a menciona cu e hobennan tabata hopi interesa den e trabao di polis, mustrando asina cu un di nan por bira polis den futuro. Sigur un dia interesante, caminda cu tabatin intercambio di hopi informacion.
