Parlamentario Alan Howell a indica den reunion publico den Parlamento tratando e fondonan di Tourism Enhancement Fund (TPEF) cu ta importante pa cuminsa mira turistanan cayanan na San Nicolas y fondonan di TPEF lo ta di vital importancia pa yuda embeyece e cayanan akinan.
San Nicolas ta un ciudad cu tin su historianan tambe y Alan Howell lo kier wak den futuro hopi turista ta cana rond hunto cu un tour guide explorando e ciudad di San Nicolas. Dimes cu trecenan den San Nicolas lo pone e economia draai un tiki tambe. Ta imposibel cu diariamente miles di turista ta pasa bay Baby Beach y den caya di San Nicolas ta bashi di turista. Segun Alan cu un poco di creatividad minister Dangui Oduber mester por trece e cambio ey tan anhela.
Igualmente e parlamentario di POR ta bisa cu e beach y pier di Cura Cabay/Zeewijk a keda hopi bunita, pero e falta movecion. Pesey e ta pidi pa crea movecion pariba, pa e turistanan por yega e parti aki tambe.
Den cuadro di esakinan el a haci e siguiente preguntanan y comentario:
Kico e plan ta pa atrae turista pa San Nicolas?
Con lo sigui embeyece e beach pa atrae turista?
Ki plan tin pa embeyece e parti di ciudad di San Nicolas pa atrae turista?
Mirando e sla duro cu a haya cu e accident pisa na Malmok, no mester lubida cu e unico pilar te awo ta turismo y mester mantene mas sigur posibel. E ta puntra si minister sa kico a pasa y kico minister ta haciendo pa evita cu esaki por bolbe sosode den futuro?
Minister Dangui Oduber a contesta tur e preguntanan satisfactoriamente y Parlamentario Howell a keda hopi contento di por a scucha e diferente desaroyonan y atencion cu San Nicolas y vecindario lo bay haya.
