Proximamente Su Mahestad Rey Willem-Alexander compaña pa Su Mahestad Reina Maxima y Su Altesa Real, Prinses van Oranje, prinses Amalia, lo ta di bishita den e parti Caribense di Reino Hulandes. E bishita aki lo ta for di diabierna 27 di januari te cu diahuebs 9 di februari 2023.
Den e prome parti di nan biahe, nan lo ta na Boneiro, sigui pa Aruba y despues Corsou. Den e di dos parti di nan biahe, nan lo bishita St. Maarten, St. Eustatius y Saba. Meta di e bishita aki ta pa Su Altesa Real Prinses van Oranje cera conoci cu e parti Caribense di Reino. E islanan a traha un programa den cual cultura, naturalesa, pasado colonial, aporte di defensa, deporte y encuentro cu ciudadanonan ta central. Secretario di Estado di Relacionnan di Reino y digitalisacion lo compaña e delegacion Real.
Famia Real lo yega Aruba dia 30 di januari
Rey Willem-Alexander, Reina Máxima y Prinses van Oranje ta yega Aruba na Oranjestad unda lo tin un ceremonia di bonbini den Wilhelminapark. Despues di un encuentro cu Gobernador Alfonso Boekhoudt, ta sigui un caminata pa Parlamento pa un encuentro cu e lidernan di fraccion. Despues e delegacion ta sigui pa Cocolishi, na unda Conseho di Minister ta ubica. Aki lo tin un encuentro cu Minister Presidente y e ministernan. Na caminda nan lo wordo saluda pa publico den presencia di Leerorkest y tambe un coro hubenil.
E merdia ta den cuadro di un bishita na San Nicolas, un area rico na diversidad cultural. Na Filomena College lo tuma luga un presentacion tocante Boy Ecury, e heroe di resistencia Arubiano-Hulandes. E presentacion ta tuma luga na un mural di Boy Ecury. E muralnan ta central durante e caminata door di e ciudad. E muralnan a wordo crea durante Aruba Art Fair door di artistanan local y internacional.E delegacion ta sigui cu un bishita cortico na e Museo Industrial di Aruba. Finalmente e bishitantenan Real por disfruta di un presentacion di entre otro street-dance, “spoken word” y di carnaval duna door di un gupo di bailado hoben.
Pa loke ta e di dos parti di nan bishita na Aruba, diamars 31 di januari, e pareha Real y Prinses van Oranje, e mainta aki lo ta bishita Parke Nacional Arikok. E parke ta acapara un area proteha di 20% di superficie di Aruba. E delegacion Real lo haci un caminata door di e parke, ta topa cu e creadornan di e pelicula di naturalesa unico tocante e 6 islanan, y lo combersa den e “Center of Cultivation” cu rangernan hoben (“junior rangernan”) tocante mantencion y maneho di naturalesa.
Despues nan ta haci un bishita na “Koninklijke Aruba Aloë”, funda na 1890. E delegacion Real lo observa con e empresa ta cultiva y procesa aloë vera den producto pa cuido y ta papia cu represenantenan.
Parti merdia e delegacion Real lo ta di bishita na Universidad di Aruba. Nan lo participa na e lectura tocante ley Caribense y lo combersa tambe cu e studiantenan.
Seguidament Rey Willem-Alexander y Prinses van Oranje lo bishita e academia di futbol den Compleho Deportivo Frans Figaroa. Na e academia di futbol, e hobennan talentoso ta haya extra training di futbol, bou di guia di entrenadornan cualifica, cu ta traha estrechamente cu KNVB. Reina Máxima lo bishita un agricultor, participante di Business Academy di Qredits.
Den e orananan di anochi, Famia Real lo asisti na Bon Bini Festival, cual lo ta den Fort Zoutman. Seguidamente nan lo dal un paseo riba Plaza Padú, na unda lo tin diferente presentacion musical, unda cu e bishitantenan lo por cera conoci cu e productonan local. E delegacion Real lo participa na un exploracion colorido di cultura y historia di Aruba, cu musica y baile Caribense.
Diaranson, prome di februari, Famia Real lo termina nan bishita na Aruba y lo sigui pa Corsou. Ministerio di Defensa tin algun base den e parti Caribense di Reino pa proteha e teritorio. Defensa ta comprometi tambe contra transporte di droga, ta sostene accionnan di rescate riba lama y ta duna ayudo di emergencia durante orcan. Pareha Real y Prinses van Oranje lo biaha di Aruba pa Corsou riba e barco di Guardacosta di Reino, Zr.Ms. Holland. Abordo nan lo hiba un combersacion tocante e aporte di Defensa den Caribe, sigui pa un recorido riba e barco y e diferente demostracionnan.
