Arubus a cumpra varios bus nobo pa reemplasa un parti di e flota bieu cu nan tin. Sinembargo awe dos luna despues ainda e busnan aki no a subi careteranan di Aruba y tin un motibo pa esaki. E busnan aki a yega Aruba dia 13 di augustus den dos cargamento.
Por a scucha hopi critica cu a paga asina hopi placa pa compra di e busnan y no tin fin pa pone nan den operacion. Investigacion cu 24ora.com a haci a duna como resultado cu e busnan tin number poni riba nan caba y ta parce cu nan mester a subi caya ora cu Arubus celebra 40 aña di existencia. Sinembargo e fecha a yega y pasa. Awo por a compronde cu e motibo cu nan no por subi caya ta cu e sistema di airco no ta adecuado pa e clima calor cu tin na Aruba.
Ainda por corda con den luna di juni Minister di Transporte y Comunicacion Chris Romero a biaha cu un delegacion pa Brasil, durante 9 dia, pa inspecciona e busnan cu a cumpra y cu tabata practicamente cla. E mandatario e tempo ey a splica cu e busnan aki ta diseña segun specificacionnan poni door di Aruba. Awo ta resulta cu e airco no ta sirbi pa e clima cayente cu tin na Aruba. Riba dje por a nota cu e busnan aki cu ta completamente airco, tin apenas algun bentana chikito cu si airco daña, no por sigui uza nan pa motibo cu no tin circulacion di aire.
E gran pregunta ta, kende ta bay tene responsabel pa e compra aki; kendenan tur a duna aprobacion pa e busnan aki. Ta un suma grandi a saca pa compra di e vehiculonan aki y ningun di nan ta den uzo awo.
Di e ultimo flota cumpra, tempo cu Minister Otmar Oduber tabata encarga cu Transporte, a haci compra di algun pero mayoria no ta den funcion mas; nan tabata mal calidad pa cual masha poco di nan ta den uzo awendia.
Arubus tin un necesidad grandi di busnan nobo. E uniconan cu a duna resultado ta e busnan cu a cumpra for di un compania Chines y cual mayoria ta den servicio ainda.
