Den e di dos siman di november, e federacion di ahedrez Ecuatoriano lo organisa e torneo Panamericano Amateur den e sección
Sub-2000 absoluto esaki na e cuidad Guano. Mas cu claro e federacion di Aruba tambe lomanda dos representante den personanan di Octavio Croes y Jose (Chelo) Pesqueira, cu dialuna awor lo biaha pa Ecuador. Tanto Octavio como Jose ta e dos hungadornan mas halto riba e ranking di dicho federacion y tin mas punto acumula cual a duna ambos e derecho di competi pa Aruba. Dia 7 di november e weganan lo inicia y lo dura te cu diadomingo 12 di november.
Ta bon pa bisa cu tanto Chelo Pesqueira y Octavio Croes tin experencia den torneonan internacional na nivel regional, continental y mundial. Ambos a competi pa Aruba den competencianan di taya dunando bon bataya. E federacion di ahedrez a crece enorme den e ultimo anjanan caminda grandi y chikito a cuminsa praktica e deporte di strategia y mental.
Mester bisa cu e tres prome lugarnan den e Panamericano Amateur na Ecuador lo gana e derecho pa participa na e World Amateur Championship 2018 na Italia.
Un danki sigur na Lotto, e Loteria di Aruba pa medio di Comision di Subsidio cu a yuda subsidia e biahe di e dos ahedristanan di Aruba pa e torneo Panamericano Amateur 2017 na Guano, Ecuador.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.
