E medidanan tuma na Hulanda ta sigui trece su consecuencianan, inclusive pa e islanan ABC den Caribe. Agencianan di biahe a dicidi di scrap pa aworaki tur vuelo di vakantie. TUI no ta bula mas ni pa destinacionnan di invierno ni luganan exotico den solo. Corendon tambe a stop vuelonan di vakantie. Esaki ta e consecuencia di e conseho negativo di biahe tuma relaciona cu corona. Minister van Nieuwenhuizen di Infrastructura ta bini cu medidanan adicional.
E ultimo vuelonan turistico a sali pa islanan Canario y Antia. Pa Corendon esey tabata solamente Boneiro. Te cu ayera tabatin vuelo ainda pa e destinacionnan aki, pasobra nan tabatin codigo geel, pero mientrastanto Ministerio di Asuntonan Externo a pone e luganan aki tambe riba codigo oranje.
Cu codigo geel tabata permiti pa bay vakantie, pero cu codigo oranje tur biahe cu no ta necesario ta wordo desconseha.
E ultimo dianan ainda tabatin filanan largo na e salanan di salida di Schiphol. Esaki tabata un sumpia den wowo di Van Nieuwenhuizen. El a bisa cu e ta “decepcion y rabia” pa cu esaki.
Den un carta pa Tweede Kamer e mandatario a bisa cu e ta haya e “drukte” na Schiphol inaceptabel y cu el a palabra medidanan adicional cu e sector di aviacion pa descurasha biahenan innecesario. “Por lo menos mi ta investigando si ta posibel pa bini cu un medida den cual e biaheronan mester indica si ta trata di un biahe di emergencia,” e minister a skirbi den su carta. Na inicio di otro aña e lo informa Tweede Kamer riba esaki.
Dick Benschop, director di Schiphol, tambe a haci un apelacion pa biaha solamente si esaki ta berdaderamente necesario. E ta desconseha e hendenan pa bay awo cu vakantie. E aeropuerto ta tuma medida pa anda cu e “drukte” y cu tur hende ta sigur.
E agencianan di biahe a haya nan mes obliga pa anula tur vakantie di inviero. Esnan cu a yega nan destinacion caba, por finalisa nan vakantie, TUI a informa. Ta recoge e hendenan na final di nan vakantie.
