Aña Parlamentario 2019/2020 a clausura, unda a scoge e presidente y vice-presidente pero tambe e di dos candidatonan. Parlamentarionan a reeligi mr. Juan “Ady” Thijsen como presidente di Parlamento. E ta agradecido na e parlamentarionan cu a reeligie y dun’e sosten pa sigui presidi Parlamento. E trabou como presidente ta responsabel y Thijsen ta kere cu esey ta duna satisfaccion cu ta haci algo bon, tambe a felicita Alan Howell como vice-presidente.
Na september 2019 nan a cuminsa cu e trabou, unda cu semper nan ta prepara p’e presupuesto y tur cos pa 2021. COVID-19 a dal Aruba duro y esey a afecta aña parlamentario. Parlamentarionan a tuma nan responsabilidad y por mira esey con a hiba e reunionnan, asina el a expresa.
COVID a haci un impacto grandi riba presupuesto 2020, pasobra tabata prepara p’e presupuesto cu un surplus di 46 miyon. Segun Thijsen, tabata bay den bon caminda pero COVID a boltia tur cos y mester a aproba presupuesto cu un deficit hopi grandi. Henter mundo ta afecta y aki mester mira con ta bay hacie.
Hulanda a cuminsa cu negociacion tanto cu Aruba, Corsou y St. Maarten, unda kier bin cu dos rijkswet y esey a pone un stempel riba e desaroyo cu tin den e parti di Parlamento y gobierno. “Te cu awe ainda e efectonan t’ey,” el a sigui bisa. Segun Thijsen, den tres aña Aruba a demostra cu tin gobierno, Parlamento y poder hudicial, pero a purba tene otro na un distancia y mas independiente di otro. Gobierno ta den negociacion cu Hulanda p’e rijkswetten, pero Parlamento a para duro cu su opinion di no kier esaki. A bin cu mocion y esey ta bunita den democracia.
Den un staatsregeling tin e artikel cu ta bisa cu Parlamento no ta dicidi tur cos, pero tin di traha segun e constitucion. Artikel 3.22 di staatsregeling ta bisa cu Parlamento di Aruba tin autoridad pa sali na defensa y salvaguardia e interes di pueblo di Aruba, unda cu nan por bay papia cu Gobierno di Reino y por bay Eerste y Tweede Kamer. Parlamento no a tuma e decision ainda di bay papia cu Hulanda, pasobra tin e confiansa cu lo bin un bon resultado. Den tur reunion di Parlamento, esun cu a yama mas atencion tabata e opzegging di confiansa di Minister di Infrastructura cu tabata uno excepcional.
