Durante nos bishita na Hulanda den conexion cu Dia di Reino, nos a combersa cu mr. Juan Ady Thijsen, minister plenipotenciario, y puntr’e kico tur tin den tapara pa loke ta agenda di Aruba Huis pa e aña venidero.
Thijsen ta afirma cu e ta hopi contento cu 2024 ta yegando pasobra e aña aki lo ta uno cu lo mira hopi fruto di e simiya cu Gabinete di Aruba a sembra na Hulanda. “2023 tabata un aña hopi duro pa nos,” Thijsen ta expresa. A traha duro pa pone hopi cos na ordo bek cual a logra, y pa 2024 nan lo ta enfoca riba diferente cos, y sigur algo grandi ta un conferencia di embahador. Esaki lo ta algo hopi grandi segun Thijsen, unda tur embahador cu ta na Hulanda, di hopi paisnan, lo bay Aruba pa un conferencia grandi na september.
E aña 2024 tambe sigur lo conoce un otro Aruba Dag, charlanan cu studiante, poniendo mas enfasis riba e studiantenan, “pasobra nan ta importante pa nos, enseñansa ta importante pa nos,” Thijsen ta expresa.
Tin un programa basta grandi tambe unda Thijsen no a bay den detayes y simplemente a haci un indicacion di esaki, cu nan lo ta hopi ocupa mes durante 2024 segun e ta expresa. E renobacion di e edificio tambe ta andando y lo dura por ta dos of tres aña.
Thijsen alabes a tuma e oportunidad pa desea comunidad Hulandes, e comunidad di Reino pero specialmente comunidad di Aruba un bon pasco y bon cambio di aña 2024 cu hopi bendicion.
