Mainta tempran a mobilisa diferente unidad di polis direccion Barcadera y Sero Teishi, pa un situacion tenso y peligroso riba tereno di dera sushi. Un persona completamente sunu a subi tereno cu arma den su man y cu intencion di causa destruccion y/of ladronicia di un of mas truck riba tereno di compania priva.
Segun a compronde di testigo na e sitio, e persona aki lo tabatin basta rato ta purba destrui truck riba e tereno. El a pasa di un truck pa otro te na momento cu el a logra start un di nan. Intencion tabata di sali for di tira e tereno cu e truck pero mirando cu e no tabata por a maneha esaki y no tabata conoci cu e tereno, el a bay pega e truck den un pida buraco y no por a maniobra e truck mas.
Polis mesora a drenta den accion mirando cu e tabata menasa y kier a bandona sitio den un di e otro trucknan. Esaki a sosode den careda di 7:00AM. Na yegada di polis a cuminsa un persecucion chikito cu a termina cu detencion di e sospechoso.
Por a constata presencia di unidad di K9 tambe cu a bin reenforsa e polisnan di Santa Cruz como cu e situacion tabata mustra peligroso. Un rato despues a transporta e sospechoso warda di polis.
Tin di menciona tambe cu e localisa e arma blanco den un di e trucknan, lora den un shirt. Departamento forensico lo tuma tur materia over pa asina traha riba investigacion.
