Dialuna anochi, den careda di 7:40 pm, a sosode un accidente fuerte riba e caminda di Coba Lodo. E accidente aki tabata entre dos auto, un pickup Nissan berde number A-50394 y Toyota Corolla cora number A-878.
Ambos auto tabata bayendo direccion contrario y na dado momento e chauffeur di pickup a bay lora na su man robes, consecuentemente a crusa dilanti e Corolla. Esaki a pone cu e chauffeur di e Corolla no por a evita mas y a dal fuerte contra e pickup.
Polis a presenta na e sitio pa asina documenta loke a sosode. Tambe a pidi asistencia di ambulance, pa un persona cu a termina herida. Na sitio dos unidad di ambulance a presenta, di biaha e paramediconan a cuminsa atend’e cu e persona herida.
Despues cu a stabilis’e, di biaha a transport’e pa hospital, unda el a ricibi atencion medico mas avansa.
Ambos auto a ricibi hopi daño material. Hasta airbag a sali den e Toyota Corolla. E Toyota Corolla a sufri daño n’e parti dilanti, mientras cu e pickup na parti drechi.
