Diasabra atardi, alrededor di 5:20 pm, a tuma luga un accidente cu herido na Tanki Leendert. Tabata na e crusada net pabou di Misa di Tanki Leendert. Aki ta caminda cu dos auto a accidenta pa falt’i duna preferencia.
Un Suzuki Vitara tabata biniendo for di pariba direccion pabou y e pickup marca Mitsubishi a subi caminda sin duna preferencia. E chauffeur di e pickup a bay “take a chance” pa subi caminda, pero a salie caro.
E chauffeur di e Vitara a resulta herida. Ambulance a trat’e na sitio pa djey transport’e pa hospital p’e ricibi atencion medico avansa. Debi na e impacto, e airbag di e Vitara a bin afo. Daño material tabata basta.
Polis di trafico a presenta pa atende cu e accidente, mientras cu patruya di Noord a cera ambos band’i crusada pa e specialista haci su trabou libremente.
