E decision di Hof den e caso Otmar Oduber vs Aruba Bank, cu e instituto bancario ta esun cu a apela, tabata un decepcion pa e famoso abogado local mr. Hans Sjiem Fat. “Mi no ta di acuerdo cu e decision aki,” Sjiem Fat a bisa den un declaracion na 24ora.com y TREMPAN.
Sjiem Fat ta un abogado cu un trayectorio largo, yiu di e prome generacion di abogado den tempo moderno esta di mr. Paul Sjiem Fat.
Ta hopi caso mr. Hans Sjiem Fat tin den su portofolio pa cual awe e por bisa cu e ta decepciona cu decision di Hof. El a splica cu normal decisionnan den casonan sumario ta basa riba un evaluacion di e interesnan di ambos banda, pa dicidi cual tin mas peso.
E ta haya cu corte no a duna suficiente peso na e echo cu e acusacionnan contra di Oduber den e caso penal/ Flamingo cu a resta ta hopi menos serio cu e acusacionnan den e caso original.
Originalmente tabatin: Labamento di placa; participacion den un organisacion criminal pa estafa pais Aruba y cu Oduber lo a adkiri propiedadnan durante e periodo cu e tabata minister, sin por a splica con el a adkiri esakinan.
“Sinembargo Ministerio Publico y Landsrecherche no a haya ningun prueba pa e acusacionnan aki, no obstante un investigacion cu a dura cuater aña. Awo, en bes cu Ministerio Publico ta seponeer e caso contra Oduber, nan a dicidi di persiguie toch riba algun punto,” e abogado a splica.
E acusacionnan cu tin awo ta: otorgamento di algun tereno contra di e maneho estableci pa DIP; pone algun spookambtenaar na trabou, y cu nunca a presenta na trabou; duna trabou na algun miembro di su partido na DOW of Serlimar.
Ta acusacionnan, e ta bisa, cu no por tuma na serio. E Minister di Infrastructura tin e pleno autoridad pa otorga tereno y tambe tin autoridad pa establece maneho na DIP y cambia maneho. Hunto cu e Management Team di DIP, Oduber a dicidi di traha un cambio den e maneho a base di cual e terenonan en cuestion a wordo otorga. Y esey, e ta bisa, ta loke cu a pasa.
Lesa relato amplio den TREMPAN.
