Abogado mr. Vito Carlo, den su pleidooi diamars, a bisa hues di biaha cu e tin e firme conviccion cu despues di a scucha rekisitorio y tur loke defensa a trece dilanti, cu Corte lo declara Ministerio Publico no admisibel den su demandanan. Esaki debi na e violacion di normanan di parti di fiscal. El a menciona tambe cu e derecho pa persecucion di su cliente pa abuso di funcion den e periodo di 24 di september 2013 a caduca, pa cual Ministerio Publico pa e periodo aki mester wordo declara no admisibel den su demanda y no por persigui su cliente Frederick Every.
E citacion contra e acusado aki ta complice di malversacion riba e periodo di februari 2012 te cu 22 di maart 2017, cometi su so of hunto cu Leoncita Arends, Rebecca Richardson, Franklin Abath y Benny Sevinger. Tambe e tin e acusacion di abuso di funcion pa e mesun periodo.
E abogado a papia di e imagen cu Ministerio Publico a crea durante tratamento di e caso aki, cu corupcion ta existi na gran escala y ta un desaster politico aki na Aruba. Y tambe cu contacto personal entre ciudadano y ministernan ta tuma luga solamente na Aruba. A splica con e cultura local ta, unda cu ciudadanonan facilmente por haya contacto cu minister of nan trahado y esaki inhustamente ta wordo cataloga door di fiscal como un politica di Aruba so.
Un investigacion internacional di Hulanda a mustra cu 23% di Hulandesnan tabatin contacto personal na un servicio publico. Banda di esaki, e confiansa den politica Hulandes nunca tabata asina abou manera cu den e ultimo añanan. Shete di dies persona ta bisa cu no tin confiansa of poco confiansa den politica nacional, mesun cos di e confiansa den e Gabinete y Prome Minister Rutte. Hulandesnan ta haya cu Gobierno ta wordo guia door di interesnan priva di un grupo chikito.
Den cuadro di esaki el a puntra den Corte a base di ki maneho, regla of ley ta prohibi, segun Ministerio Publico, ta prohibi pa entrega un peticion personalmente na un minister. Of cu por bisa cu e brochure di DIP ta un maneho. Su pensamento ta e cu e conclusionnan di fiscal ta basa riba asumptions y conclusionnan.
A cuestiona declaracionnan parcial di testigonan, cu na pensamento di Ministerio Publico, lo sa e proceso pa otorgamento di erfpacht sin cu nan a investiga si esaki di berdad ta cuadra. Pio pasobra ta trata di testigonan cu tin conexion cu rivalnan politico di e sospechoso principal den e caso aki. Testigonan cu tin contracto laboral cu e actual Gobierno. Testigonan cu tambe a traspasa derechonan di erfpacht a cambio di pago, mientras cu e proyecto (un vivienda) no tabatey ainda. “Ministerio Publico y su team investigativo simplemente no tin e conocemento y experencia necesario di aspectonan civil den e caso aki cu ta esencial pa por evalua credibilidad di e testigonan,” abogado Carlo a bisa.
Esaki tabata e prome parti di e defensa unda el a pidi pa declara Ministerio Publico no admisibel den su demanda.
