Dia 19 di juli ultimo a fayece Fernando “Nando” Kock, un gran persona cu a haci un trabou importante pa e mundo di scouting y hubentud na Aruba. Nando Kock a funda un grupo di scouting yama Cascabel na Ayo y a logra atrae hopi hoben di bario Sero Pita, Tamarijn y Ayo pa bira miembro. E tabata e motor tras di e grupo aki y a dedica hopi aña di su bida na grupo Cascabel y tur su miembro nan.
Tabata yam’e “GL”, como e tabata e groepsleider y hopi a keda yam’e asina tambe henter su bida.
Fernando “Nando” tabata un persona cu tabata dedica tempo na hubentud, tur weekend e tabata prepara y cla cu yen di actividad pa e hobennan den bario Ayo y rond di Aruba. Hiking, campamento tur rond di Aruba, traha kampvuur etc. tabata su specialidad.
Tempo cu Grupo Cascabel a participa na un jamoboree na Dominica, tur weekend e tabata busca e scoutnan mainta trempan pa participa na training.
Semper Fernando “Nando” a siña e hobennan disciplina y respet. Semper e tabata alegre y ta hopi bon momento e miembronan di grupo Cascabel a pasa cu’ne. E storianan cu e miembronan di grupo Cascabel tin cu Fernando “Nando” ta hopi.
Fernando “Nando” Kock tabata un lider di comunidad, cu a traha den silencio pa hubentud, sin busca reconocimento y sin beneficio propio, un gran persona, un amigo y un mentor pa hopi hoben di Ayo y vecindario.
Condolencia na su señora Mena, su yuinan Giovanni, Ingrid y Lisa y henter famia Kock.
Ayera a despedi di un gran persona. Cu “GL”, Sr. Fernando “Nando” Kock descansa na paz.
