Awe mainta 9:00 am a cuminsa cu trabou di mantencion riba brug Fredis Refunjol. E trabounan ta cuminsa for di 9:00 am te cu 7:00 pm pa dos siman largo. For di 7:00 pm te cu 9:00 am e caminda lo ta habri normal pero cu algun adaptacion. E mantencion ta encera riba e top di brug, unda ta haci trabou di zandblast, kita frusto y verf e brug. Esey ta e trabou preventivo pa evita cu e ta bira pio.
Recien, ing. Marlon Croes, director di DOW, a indica cu e mantencion ta responsabilidad di e contractor p’e duracion di e contract cu tin. E mantencion di brug ta algo rutinario y ta prome biaha e lo ta di forma extraordinario.
DOW, como autoridad di e contract, tin di duna Odinsa/CCC e oportunidad di haci mantencion y e ta algo bon pa ambos partido pa haci e trabou di mantencion preventivo, y asina ey e por keda bon p’e proximo añanan.
