Despues cu hues comisario a prolonga detencion di ex-minister plenipotenciario (di MEP) Guillfred Besaril diabierna mainta, porta di KIA a habri p’e den oranan di atardi. Tabata den oranan laat di atardi Guillfred Besaril a yega KIA cu su pertenencianan. Pues e pensamento cu ta prolonga su detencion cu 16 dia y lag’e bay despues, no a sosode.
Manera ta conoci, no ta normal cu Recherche ta haci interogacion den fin di siman. Pues probablemente e lo keda simplemente lombra wowo eyden. A detene Besaril pa caso Tulipan. Por corda riba dia 13 di februari a invit’e acudi na Landsrecherche y a dicidi di detene pa mas investigacion.
Prome cu a detene, el a trata di tur forma pa regla e asunto aki, incluso a busca placa pa paga e debe cu a surgi a causa di e gastonan personal cu el a haci riba cuenta di Arubahuis. Sinembargo esaki no a yud’e.
El a pasa henter dia na Dienst Landsrecherche Aruba (DLR). Atardi despues di oranan largo di detencion, a topa cu e abogado na su salida for di DLR. “Awe ta prome dia di verhoor y nos ta bay tin hopi confiansa p’e proximo dianan”, tabata prome palabranan di mr. Doris Canwood.
Sinembargo dianan a pasa y el a keda deteni y awo hasta a dun’e diesseis dia mas. Automaticamente esey a nifica cu mester mand’e KIA, pasobra un sospechoso no por keda mucho dia cera na un ward’i polis.
TOCANTE GUILLFRED BESARIL
Guillfred Besaril, kende originalmente ta un Polis, a drenta sindicalismo y desde aña 2013 ta milita riba lista di MEP pa cual el a drenta Parlamento. Den su prome eleccion el a logra 833 voto, den eleccion 2017, su votonan a baha na 508 y den eleccion na juni 2021 a logra 203 voto individual.
Diamars dia 21 di september 2021, Conseho di Minister a ratifica su nombramento di dia 20 di november 2017 como Minister Plenipotenciario, staciona na Den Haag, Hulanda. Guillfred Besaril a reemplasa Juan David Yrausquin, cu a tuma e funcion over despues cu Alfonso Boekhoudt a tuma retiro pa bira Gobernador di Aruba.
Tocante Caso Tulipan
E caso aki ta relaciona cu e investigacion grandi cu tin andando riba ex-Minister Plenipotenciario Guillfred Besaril pa uzo indebido di fondonan di pais Aruba. Prome detencion a tuma luga dia 16 di januari, 2024, Glenn Ling (Director suplente di Arubahuis). Caso Tulipan ta dirigi riba iregularidadnan na Arubahuis den e periodo di 2018 pa 2021. Tempo cu Besaril tabata den funcion di minister plenipotenciario di Aruba na Hulanda.
