Diaranson merdia docente cu studiantenan di SPO Savaneta cu tabata riba veld cerca di scol a pasa den susto di nan bida. A scucha tiro den nan direccion mientras nan tabata riba e veld.
Directiva di e scol a bati alarma na Polis di e sucedido mesora. Recherche a keda yama pa investiga. No ta conoci si a haya huls na e sitio.
Studiantenan ta papia cu a tira for di un auto, otro testigonan ta bisa cu e tiro(nan) a bin for di direccion di un cas of apartament. Mas atardi recherche a bay papia cu algun habitante den area di e veld unda supuestamente a señala cu e tironan a bin for di dje.
Mas trempan den oranan di mainta a sosode un pelea riba of den area di tereno di scol, no por descarta si e pelea y e tironan scucha ta relaciona cu otro. Vocero di Cuerpo Policial no por a duna mas claridad riba e sucedido tampoco.
