Chris Romero: Aruba y Colombia ta firma acuerdo di aviacion

Minister di Transporte, Comunicacion y Sector Primario, sr. Chris Romero, a firma un acuerdo pa cu Transporte Aereo cu e Minister di Transporte di Colombia, sr. German Cardona Gutierrez.

E acuerdo aki lo facilita e establecimento y explotacion di servicionan aereo internacional entre Aruba y Colombia, di parti e aerolinianan asigna pa ambos pais.

Ta spera cu e acuerdo aki lo intesifica e conexionnan aereo entro e dos paisnan. “E convenio nobo di transporte aereo entre Colombia y Aruba, lo tin como proposito e fortificacion di e union existente cu semper tabatin entre e dos nacionnan aki, den aspectonan manera turismo, sectornan social y economico. Di e manera aki nos ta estrecha mas ainda e lasonan cu pa siglonan a uni nos paisnan”, tabata palabranan di Minister Chris Romero den cuadro di e acuerdo nobo cu a keda firma entre Aruba y Colombia.

Ademas di intensifica turismo den ambos via, e acuerdo aki lo permiti e exploracion di otro alternativanan pa cu turismo. Colombia y Aruba ta sondeando e mihor posibilidadnan pa genera paketenan conhunto di turismo pa ofrece na e mercado Europeo. “Nos Embahada ta apoyando e esfuersonan aki, nos ta pensa cu e posicion di e partinan di Caribe Hulandes lo por fungi como brug entre Europa y Latino America, como cu e lo por hunga un rol importante den e incremento di turismo Europeo pa e region”, Embahador di Reino Hulandes na Colombia, Jeroen Roodenburg, a afirma.

Miriam Dabian, Director di Aruba Tourism Authority (ATA) pa Latino America, ta di pensamento cu “e firma di e acuerdo aki ta constitui un gran avance tanto pa Aruba y Colombia den e desaroyo di Transpote Aereo. Nos ta spera cu esaki por traduci den beneficionan comercial door di e apertura di rutanan aereo nobo, for di y pa nos isla”.

E relacion entre Colombia y Aruba ta uno estrecho. No solamente den terminonan turistico y comercial, como cu Aruba ta ocupa e di 13 lugar pa loke ta destino di e exportacionnan Colombiano, si no tambe, entre otro temanan, pa e atencion medico cu pacientnan cu diagnosticonan medico compleho proviniente di Aruba, ta ricibi na diferente ciudad di Colombia.