Alzheimer ta un malesa progresivo cu ta afecta e celnan di e celebro, ocasionando cu poco poco esakinan ta muri y e persona poco poco ta bay ta lubida hopi cos importante, cosnan basico cu e ta haci henter dia.
E ta lubida su famianan y asina diferente aspecto mas.
Mahalia Manuela ta secretaria cu ta traha na Centro di Memoria cu a trece algun informacion riba e malesa di Alzheimer.
Como secretaria di Centro di Memoria, Mahalia Manuela a bin pa realisa cuanto famia tin cu ta bibando cu un persona cu demencia of mas problema cognitivo. Pesey ta e motibo cu Centro di Memoria a wordo funda na December 2014.
Centro di Memoria ta un poli di hospital cu ta haci diagnostico y guia pa hendenan bibando cu demencia.
Si ta ripara cu un famia of un ser keri tin señalnan cu ta indica cu por ta un demencia of otro problemanan cognitivo, ora por acudi cerca Centro di Memoria.
Ta acudi na Centro di Memoria cu un verwijsbrief di e dokter di cas. E ora e pashent ta yega cerca nan y ta traha cita pa e trayecto di e Centro di Memoria.
E trayecto ta consisti un pre-screening. Esey ta tuma luga na cas. E case manager ta bay cas, ta analisa e situacion, e ta papia cu e pashent, cu e famia y despues ta haya un cita na Centro di Memoria. Ta yama esey un carousel. Ta wak e specialista geriatico, ta wak e enfermera, e psicologo y despues, depende di e diagnostico, tambe ta haya un natraject.
Tambe ta haci un CT Scan di e cabes y ta saca sanger pa haci diferente test.
E resultadonan di tur esaki ta wordo palabra den un team multidisciplinario. Ora bin na un diagnostico, e famia cu e pashent ta bin bek y ta haya resultado.
Si ta trata demencia, ta sigui cu natraject. E natraject ta consisti cu cada tres of seis luna, nan ta bin bek na e specialista geriatico pa wak con ta bayendo.
Tambe nan ta bin pa mantelzorg bijeenkomst. Esey ta manera un anochi di informacion pa e famianan, caminda cu nan por papia. Asina nan por papia di nan experiencia cu nan tin cu nan familiar of ser keri.
Na Centro di memoria a test caba 765 pashent desde December 2014, di cual 44 porciento tin un forma di demencia, cual ta un cantidad basta halto, segun Manuela. E pashent di mas hoben cu demencia, ta un persona di 52 aña y e pashent di mas grandi ta un señora di 94 aña.
Centro di Memoria ta situa na San Pedro Paviljoen y por tuma contacto cu nan na 5974342 of por bay riba nan pagina di Facebook di Centro di Memoria.
Espacio
Segun Mahalia Manuela, ta basta dificil pa haya espacio. Tin hopi cas priva y tambe tin SABA, sinembargo tin un wachtlijst, pa asina ubica e hendenan aki. Hopi biaha ta purba di mantene e pashentnan na cas, pa nan tin un bon calidad di bida den nan propio ambiente. Esey ta e meta. Mester di cierto cosnan pa por logra esey.
Cura
No tin cura pa e malesa aki. Ta depende tambe ki sorto di demencia tin y ta depende na ki fase bin diagnostica cu tin e problema.
Pero un hende por biba for di comienso te na final cu un forma di demencia.
Tin mas hende cu tin demencia, pero no a wordo diagnostica pa Centro di Memoria. E porcentahe ta hopi mas di loke cu nan mes tin.
Hopi biaha, pa ora e famia acudi na Centro di Memoria, e pashent ta den un fase hopi avansa
