Durante e reunionnan cu a tuma luga como parti di ANATO na Bogota, a logra finalisa acuerdo entre Aruba Tourism Authority (A.T.A.), Aruba Airport Authority (AAA) y Wingo, pa un ruta nobo entre Cali y Aruba cu lo cuminsa opera desde dia prome di juli 2023 riba diaranson y diasabra.
Presente na e reunion di parti di Aruba tabata Ronella Croes, CEO di A.T.A., Sanju Luidens CMO di A.T.A., Jordan Schlipken, director di A.T.A. na Latino America y Jo-Anne Meaux-Arends, Aviation Business Development Executive di AAA. E ekipo di Wingo na e reunion a consisti di Andrés Camilo Franco, gerente di Comunicacion, Simón Maya, gerente di Mercadeo, Olga Trujillo, Gerente Comercial di Mayorista, Fernando León, director di Planeacion di Red y Marcela Chaves, lider di Marca.
“E inauguracion di e ruta nobo aki di Wingo ta yena nos cu entusiasmo. Colombia ta un di e mercadonan mas importante cu Aruba tin y pa e motibo aki nos tin como meta pa sigui conkista e turistanan proviniente di e pais ey. Pa 2023, nos tin un meta di mas di 37 mil pasahero for di Colombia. Hunto cu nos socionan local y den e mercado nos ta traha tur dia pa duna bishitantenan alternativanan nobo pa yega nos isla. Nos ta contento di por a logra e ruta aki y ta invita bishitantenan di e area di Cali pa bishita nos tambe”, segun Ronella Croes.
Jo-Anne Meaux Arends, a comenta cu: “Nos socionan di Wingo lo pone un avion di 186 asiento disponibel pa cada parti di e trayecto Cali-Aruba-Cali. Esaki ta demostra con atractivo Aruba ta pa sigui fortalece conectividad aereo cu e region Latino Americano, specialmente cu Colombia”.
Segun Jordan Schlipken: “Latino America ta sigui crece y nos ta rumbo pa e recuperacion completo, ehecutando plannan di accion cu por permiti nos conecta mas ciudad den nos mercado principal. E idea ta pa sigui traha pa incrementa frecuencia aereo a traves di nos socionan. Sin duda e ruta nobo aki lo impulsa nos obhetivonan di desaroyo y crecemento di bishitante for di e region”.
Tocante Wingo
A funda Aero República S.A., cu ta opera bou di e nomber comercial Wingo, desde 19 di october 2016. E compania ta pertenece na Copa Holdings. El a cuminsa bula pa Aruba na december 2016 como e prome Low-Cost Carrier pa sirbi Aruba for di Colombia. Brindando mercadonan local y di placer tarifa abou, bon ambiente y hopi flexibilidad. Separa di Aruba, ta bon pa bisa cu Wingo ta bula tambe pa ciudadnan Colombiano, manera Armenia, Barranquilla, Bogota, Cali, Cartagena, Medellin, San Andres y Santa Marta. Ta bula vuelonan regular pa Costa Rica, Cuba, Corsou, Republica Dominicana, Ecuador, Guatemala, Mexico, Panama y Peru.
Wingo a cuminsa bula avionnan 737-700 pero dos aña pasa a cambia tur nan avionnan. Awendia nan ta bula avionnan marca Boeing, modelo 737-800. Nan tin ocho di e avionnan aki, cu ta carga no menos di 189 pasahero.
