Awe mainta pa mas of menos 10:00am a logra saca e helicopter cu a accidenta dia 19 di juli caminda dos persona a perde nan bida, for di lama. Ta trata aki di e dos partinan di e helicopter cu tabata drumi den profundidad di lama na 25 miya for di costa di Aruba.
Godfried Adem, nos coresponsal na Hulanda a conta cu a hiba e helicpter riba un embarcacion special cu tabata den e area. A uza e embarcacion special y dos robot pa logra capta y saca e helicopter cu tabata parti den dos pida debi na e caida, despues cu el a sink.
Prome cu esaki a saca e “BlackBox” for di den profunidad. Durante di e tragedia, dos di e cuater tripulantenan abordo a perde nan bida. Importante pa por recupera e helicopter pa asina realisa investigacion tecnico riba e aeronave, no obstante cu e blackbox riba su mes a duna basta informacion caba, no por a haya cu exactitud kico tabata e motibo concreto di e sucedido.
Tambe ta imporante di bisa cu tur locual cu ta avionnan di Marina Real, si acaso mester sink of haya desgracia, lo tin cu trece nan bek na e base naval mirando cu nan tin aparatonan di secrecia abordo.
