E siman aki mester a reemplasa un bentana di cockpit di un Boeing 787 di e aerolinea TUI. Esaki tabata un encargo realmente grandi ehecuta na aeropuerto internacional Hato di Corsou, p’e compania Antilles Aerospace, un empresa cualifica pa haci trabao di mantencion na avion.
Den un vuelo na caminda di Boneiro pa Amsterdam, un di e bentananan di cockpit a haya un scheur. For di punto di siguridad e momento ey, e tripulacion den cockpit a dicidi pa bira bay Corsou p’e reparacion necesario. Ta p’e motibo ey a wanta e avion na tera.
Cu avion e siguiente dia a trece un bentana nobo p’e tecniconan di Antilles Aerospace profesionalmente kita e bentana gescheur y despues instala esun nobo y seya esaki. P’esey nan a haya sosten di Miles Construction cu a bin cu un kraan pa hisa e bentana di 200 kilo te n’e nanishi di e avion y cu cooperacion di Curaçao Airport Partners.
Pa duna un man TUI a manda dos funcionario Corsou. Diaranson atardi e avion por a lanta vuelo di regreso pa Amsterdam.
