Manera ta conoci, desde April 2020 Aruba Excellence Foundation (A.E.F.) a adapta na e ‘normal nobo’, actualisando su manera di facilita e training di Aruba Certification Program online. Un parti importante di e training cu tambe mester a ahusta ta e ‘field excursion’, pues e ‘island tour’, cu e participantenan tabata asisti riba e prome dia di les. E team di A.E.F. a pensa un manera inovativo pa asina mantene e concepto di ‘field excursion’ pero den forma virtual y asina e idea di un 360° virtual island tour a nace.
A.E.F. a partner up cu FUTURA – Aruba Innovation Lab, y a coordina pa asina presenta e 360° virtual island tour di Aruba Certification Program por medio di Virtual Reality (VR) Oculus goggles na e team di Bucuti & Tara Resort. E VR goggles lo duna e participante e oportunidad pa experencia e island tour di un manera virtual, comosifuera e ta fisicamente na cada un di e sitionan. En total tin 21 sitio cu ta wordo presenta den e 360° virtual island tour. E asociadonan di Bucuti & Tara por a presencia California Lighthouse, Shell Midden, Kapel di Alto Vista, Zoutpannen na Savaneta, Baby Beach y hopi mas.
Propietario di Bucuti & Tara Resort, Ewald Biemans a expresa cu e ta aplaudi e iniciativa pa crea e 360° VR island tour y a encanta e experencia aki. El a expresa tambe e importancia di mantene e concepto di ‘field excursion’ como parti di e training y ta recomenda pa tur hende saca tempo pa participa cu e curso di A.C.P. Un danki ta bai na FUTURA – Aruba Innovation Lab como tambe Skyfall Films pa hunto cu Aruba Excellence Foundation por a haci esaki posibel.
Aruba Tourism Authority a institui Aruba Excellence Foundation na juni 2018 y ta e fundacion encarga pa entre otro ehecuta e Aruba Certification Program (A.C.P.) como tambe e programa di Happy Information Officers (H.I.O). Meta principal di e fundacion ta pa sigui desaroya y implementa A.C.P. y H.I.O. como tambe otro programanan specialmente diseña pa certifica trahadonan den sector di servicio y hospitalidad, pa percura cu e nivel bon conoci di servicio excelente di Aruba, por keda riba un nivel halto.
Pa esunnan cu ta desea di participa den e curso online di Aruba Certification Program, por registra gratuitamente riba www.acp.aw.
