E boto di Kristel Fishing Aruba un biaha mas a trece un pisca masha grandi tera. Ta trata aki di un oilfish, cu su nomber original ta Ruvettus pretiosus. Na Aruba e nomber menos popular ta “kakasinsinti”. E ta un pisca comibel pero na cantidad modera. E pisca ta pisa 42 kilo y a logra pisc’e na mil meter di profundidad, pues basta hundo. E piscado Ivo Maduro y su tripulacion tabata masha orguyoso di e logro aki.
E pisca aki ta move den lama tropical. Por topa cu ne entre 100 pa 800 meter di profundidad. E pisca por crece te cu 3 meter di largura, pues casi 10 pia largo. E peso record di e pisca aki ta di 63.5 kilo, esta 140 liber. Oilfish ta rico den sabor pero ta hopi mas barata compara cu otro especienan di pisca, cu ta haci cu hopi biaha piscadonan sa bende intencionalmente como butterfish of hasta cod.
