E situacion di Stichting Algemene Bejaardenzorg Aruba ta uno di preocupa y esey ta loke e fraccionnan di MAS y Accion 21 a expresa.
Den un carta na presidente di Parlamento, mr. Edgard Vrolijk, nan a bin cu e siguiente peticion, conforme reglamento di ordo.
“Considerando:
– cu durante reunion publico di dialuna 15 mei 2023, Parlamento no tabatin acceso na varios documento valioso, incluyendo e decretonan nacional y relatonan financiero,
– cu tin discrepancia entre informacion presenta pa Minister y loke a publica den media di parti S.A.B.A. su director y directiva,
– cu SABA lo escala nan accion y e consecuencianan grave cu esaki lo por presenta p’e cuido di nos grandinan,
Na nomber di e fraccionnan ACCION 21 y MAS nos ta pidi sr. Presidente pa yama un encuentro publico cu caracter di urgencia cu Raad van Bestuur y Raad van Toezicht di S.A.B.A./C.M.C.C.”
BBO aan de grens
Pa loke t’e introduccion di BBO na frontera tambe e fraccionnan di Accion 21 y MAS tambe a expresa nan preocupacion.
P’esaki tambe nan a haci un peticion p’e presidente di Parlamento yama un Encuentro Publico cu e gremionan comercial AHATA, ATIA, CUA y KVK tocante introduccion di BBO na frontera, esaki segun conforme reglamento di ordo.
“Considerando:
– cu gremionan comercial a expresa nan preocupacion cu introduccion abrupto di BBO na frontera,
– cu no tin claridad con negoshinan chikito cu entrada menos di AWG 50.000,- lo por desconta BBO na frontera mirando cu nan no ta cobra BBO,
– cu no tin claridad si cunukeronan lo wordo afecta mirando cu nan lo por haya nan mes ta paga BBO riba cuminda di bestia cu nan ta importa,
– cu no tin claridad cuanto negoshi lo mester depende riba sistema financiero pa liña di credito pa por paga BBO na frontera y ki gasto adicional esaki lo nifica,
– cu no ta probabel cu introduccion di BBO na frontera lo NO hiba na mas inflacion manera gobierno ta argumenta,
nos ta pidi sr. Presidente pa yama un encuentro publico cu caracter di urgencia cu e gremionan comercial AHATA, ATIA, CUA y KVK.”
Ambos carta ta firma p’e lidernan di fraccion di MAS, drs. Marisol Lopez-Tromp, parlamentario Aquannette Gunn y lider di fraccion di Accion 21, Miguel Mansur.
