A nombra Karen Chastain como General Manager di e compleho di Aruba Marriott. Den su funcion nobo, e lo ta responsabel pa maneho strategicamente di Aruba Marriott Resort & Stellaris Casino, Marriott’s Aruba Surf Club y Marriott’s Aruba Ocean Club. E tin mas di dos decada di experencia den liderazgo pa e marca di Marriott Hotels y a fungi como General Manager na varios hotel di Marriott na Merca, y mas recientemente na Fort Lauderdale Marriott Harbor Beach Resort & Spa na Florida.
“Mi tabata hopi afortuna di por a traha na tur dos costa di Merca cu Marriott y mi ta sumamente contento di por bay experencia tur locual e isla vibrante di Aruba y e compleho di Marriott tin pa ofrece”, Chastain a comparti.
“Alaves di tuma e oportunidad pa dirigi un di e propiedadnan di mas prominente di Marriott den Caribe. Mi ta entusiasma pa por explora e cultura local y asina fortalece relacionnan duradero y di beneficio mutuo cu comunidad.”
Chastain tin un amplio conocemento den liderazgo financiero y un pasado exitoso den benta, maneho y e funcionamento di hotel. E ta pasiona cu desaroyo di e personal y ta hopi enfoca riba asegura satisfaccion di huesped.
Chastain ta un graduado di Ball State University cu un ‘Bachelor of Science Degree’ den accounting.
Aruba Marriott Resort & Stellaris Casino a habri na aña 1995 y tin 414 camber. Na aña 1999 a habri Marriott’s Aruba Ocean Club cu 311 camber y na aña 2004 a habri Marriott’s Aruba Surf Club cu 900 camber. E famia di Aruba Marriott ta consisti di mas o menos 1100 empleado den servicio directo. E compleho di Marriott Aruba ta esun di mas grandi den henter Caribe, tanto den cantidad di camber como den cantidad di empleado
