Diahuebs atardi a tuma lugar e ceremonia di medaya pa diferente deporte cu e participa den e ‘World Games Special Olympics’ na Berlin. Mirando cu Aruba a gana medaya di oro den e deporte di badminton, naturalmente 24ora.com tabata presente. Na momento cu a toca turno pa e finalistanan di badminton, por a mira e dos atletanan di Aruba subi riba e stage. Ta trata aki di Mildred Every y Orlando Arends. Ora cu cu a yega na prome lugar, Aruba su nomber a resona. Despues e maestro di ceremonia a menciona cada un atleta nan nomber. Despues nan mester a bini dilanti pa asina ricibi nan respectivo medaya.
Orlando a conta cu e ta hopi contento mirando cu e nunca a spera cu na su edad di 46 aña e lo ricibi un medaya di oro. E la yega di participa tempo e tabata mas hoben cu diferente seleccionan den baseball pero no a haya medaya di oro. E experiencia di hunga hunto cu un atleta special tambe tabata algo masha particular pe. Mildred tambe ta hopi contento cu e por haci Aruba orguyoso. E la hasi su esfuerso y esaki tabata tin su fruto.
Aruba a gana medaya di oro, pues promer lugar den categoria Unified Badminton. Esaki ta un categoria unda cu un atleta special ta hunga cu un atleta regular. Nan coach ta Ruben Croes. E coach a comenta cu awe e team a hunga tres wega. E promer no tabata mucho dificil, e di dos tabata tin su retonan y e final toch tabata facil.
Un pabien ta bay pa Mildred Every y Orlando Arends cu e bunita logra aki na Berlin.
E cobertura di Specia Olympics World Games Berlin ta un presentacion exclusivo di Digicel Aruba!
Digicel users let’s support Special Olympics by donating Afl 1,- by texting 𝗕𝗘𝗥𝗟𝗜𝗡 to Nr 5151!
