E politico Alberto Groeneveldt, conoci tambe riba red social como “macho nobo” y cu ta bisa di ta specialisa den organisa evento, awo tin un keho penal entrega contra dje na polis. Ta acus’e di a maltrata su cacho “Khalisee” na cas di tal forma cu awe diadomingo e animal a fayece. Veterinario a haci tur lo posibel pa salb’e, riba costo di Luna Foundation, pero no a logra den nan intento. Fiscal awo lo mester tuma un decision final den e caso pa mira si lo detene e politico pa maltrato severo y negligencia di un bestia.
Alberto Groeneveldt di 41 aña di edad ta doño di su mesun negoshi, yama Alberto Live Consultancy and Services. E ta organisa casamento pa turista y otro tipo di evento tambe. E ta un politico tambe y ultimo eleccion a aparece como candidato # 5 riba lista di Partido MAS. El a haya no mas cu 71 voto riba su nomber. Den campaña su lema tabata “Humilde, honesto, bon trahado y cla pa sirbi mi isla”.
Alberto Groeneveldt ta biba na San Barbola y ta cria un cacho tefi di rasa Chihuahua. Pa colmo e cacho a caba di haya pupies, di cual e mama ainda ta criando su yiunan. Pero Groeneveldt a mara e mama na cadena, na un forma asina cruel, cu e cadena a cort’e masha mahos den su cuero y laga e animal sufri pa masha tempo. Tambe a mira señal di maltrato riba e cacho. Bisiñanan a yama di mas cu dos siman y Fundacion Luna a yama Groeneveldt na telefon bisando cu nan lo pasa busca e cacho pero e no tabata kier of tabata bisa di lo yama bek y nunca mas a bel. Ta te ora cu un otro fundacion di cacho a yega su cas, a topa cu un situacion miserabel y condenabel.
E fundacion a entrega keho penal na polis pa e acto aki. Na un prome instante polis no kier a tuma e keho pero despues di evalua cu Ministerio Publico, a dicidi pa pasa e caso pa Polis di Bario. Na e momento ey e cacho tabata delicado y luchando pa biba ainda. Awo cu e cacho a muri awe, ta spera cu na cualkier momento fiscal lo duna ordo pa detene e sospechoso y hacie responsabel pa maltrato severo di un cacho, cu consecuencia fatal.
