Den un decision di diamars siman pasa, dia 19 di juli 2022, Conseho di Minister a bay di acuerdo pa laga Yshel Rasmijn, casa di e politico activo di MEP, mr. Juan Thijsen, miho conoci como Ady, pa e por traha pa Inspectie Volksgezondheid Aruba (IVA) for di Hulanda. E demas empleadonan den e mesun departamento ta puntra nan mes si nan tambe por haya e mesun acuerdo asina awo, esta pa traha fo’i cas, sin mester presenta na oficina tur dia, durante ocho ora pa dia.
Awe ta su ultimo dia di trabou na IVA y desde dialuna e ta cuminsa traha den e areglo nobo, di dialuna pa diabierna, pero for di Hulanda. Esaki ta un excepcion, cu segun un fuente den DRH, a yega di sosode caba den pasado, pues no ta prome biaha cu un ambtenaar ta haya un semehante areglo di trabou.
Conseho positivo
Otro ambtenaarnan ta cuestiona e decision aki, pasobra e ta basa riba un conseho di Omaira Lares, ex-casa di Ady Thijsen y cu ta e director na Departamento di Recurso Humano (DRH) di dia 8 di juli 2022 y di Dorylee Lopez, como inspector general na Inspectie Volksgezondheid Aruba di dia 5 di juli 2022. Den otro caso, e ambtenaar cu haci un peticion asina, mester contenta nan mes cu BVVD, sin cobra salario. Pues, den cierto forma, esaki a haya un sorto di BVVD pero cobrando salario normal tur luna, cu e opcion pa traha for di Hulanda.
