Riba bispo di bispo di Pasco a yega un carta na e oficina principal di Headlines Group, e agencia di noticia mas grandi di Aruba, den cual Minister Geoffrey Wever, encarga cu comunicacion, ta manda atende nos riba un entrevista teni cu Michael Williams dia 18 di december ultimo. E ekipo legal di nos compania a percura pa un contesta mesora pa e mandatario, cu apenas a drenta arena politico y obviamente a manda un carta “manda door di su partner di coalicion”, pero di cual e tin cu carga cu e contesta dirigi na dje!
Carta di Minister Wever
Den su carta e mandatario a skirbi cu dia 18 di december ultimo, 24ora.com a transmiti un entrevista cu Michael Williams, den cual e lo a menasa minister-president, su famia y minister di husticia y asuntonan social. Segun Minister Geoffrey Wever, e entrevista aki tabata riba Facebook y tabata accesibel pa usuarionan di 24ora.com.
Mas leu e ta skirbi cu, segun e, cu e declaracion haci pa Williams ta afecta bienestar general y orden publico di nos pais. E hecho cu e declaracion ta haci contra ministernan, ta haci e cuestion mas pio. Segun Wever, e tipo di declaracionnan pisa asina ta causa tension innecesario den comunidad y cu el a constata cu 24ora.com na ningun momento a atende Michael Williams riba esaki tampoco.
Di un banda Minister Wever ta skirbi cu e ta consciente cu e website di noticia, 24ora.com, ta gosa di libertad di prensa. Pero e no ta kere cu mester traduci e libertad aki den crea opotunidad pa duna ciudadanonan espacio pa menasa ministernan. Segun Geoffrey Wever, e hecho cu 24ora.com, como media, a duna Williams espacio pa papia, sin a par’e of atend’e riba su declaracionnan, ta haci cu 24ora.com a crusa e liña. E situacion aki e ta lamenta y ta considera inaceptabel.
Loading…
Reload document
Open in new tab Den un tono un poco mas di menasa, e mandatario ta skirbi cu otro aña, esta na 2022, lo bin cu un regulacion pa medionan di comunicacion, via ley. Tambe e lo introduci un Mediaraad. E ultimo aki lo tin como tarea pa promove cu den media na Aruba, ta maneha e trabou periodistico na un forma responsabel. Lo introduci un codigo di conducta pa prensa di Aruba. E codigo lo basa su mes riba principionan di dunamento di noticia den forma honesto, aplica e regla di scucha ambos banda di medalla, elimina gañamento y pa protega e bon nomber di personanan. Na final e ta expresa di ta spera cu 24ora.com lo tene su mes na e “reglanan” aki den futuro.
Contesta di Headlines Group (24ora.com)
Mesora despues di a ricibi e carta di e mandatario, locual toch a straña nos, pasobra normalmente ta e director di Directie Telecommunicatie Zaken (DTZ) lo mester a mand’e. Pero fuentenan den DTZ a confirma cu e carta no a sali di nan pasobra nan sa masha bon cu website of median digital no ta cay bou di e ley cu DTZ ta aplica y supervisa. Pues, nan no ta bay haci nan mes ridiculo manda carta pa despues haya un contesta fuerte belk. Di otro banda, ta bisando cu e carta no ta concipia pa Minister Geoffrey Wever mes, sino di su colega di coalicion, pero el a opta pa firm’e, pues e ora e tin cu carga e contesta, cu ta bay p’e, pa Parlamento, pa Gobernador, pa representacion di Hulanda na Aruba, pa e asociacion di prensa di Hulanda, Nederlandse Vereniging van Journalisten NVJ (cu nos ta forma parti di dje), pa esun di henter e continente Americano, Sociedad Interamericana de Prensa SIP (cu nos ta forma parti di dje) y pa e organisacion mundial International Federation of Journalists IFJ (cu tambe nos ta forma parti di dje y sin lubida Reporters Without Borders RSF (unda tambe nos ta afilia).
Den nos carta nos ta yam’e danki pa su carta, pero sinceramente nos no sa kico pa haci cu ne pasobra su carta no ta bisa nada. Ta sali bisa e hoben minister cu e kier pretende di bin siña nos con pa haci nos trabou, unda e ta trapa riba articulo 10 di EVRM (ley Europeo) y articulo 1.12 di nos Staatsregeling. E minister ta purba trapa riba libertad di expresion liber y riba libertad di prensa pareu. Locual ta pio den e caso aki ta, cu e minister ta haci esaki sin cu e tin cualkier tipo di autoridad pa haci tal. Como minister, e no tin ningun autoridad pa duna instruccion na ningun medio di comunicacion! Tampoco por drenta fo’i porta patras bisando di ta lamenta e asunto pa di e forma ey trapa riba nos libertad di prensa. E hecho cu ta purb’e toch, ta duna un señal di falta di conocemento of di falta di integridad di e minister.
Loading…Den nos carta a splica e minister cu e no ta e prome ni lo ta e ultimo politico (probablemente) cu ta purba cera boca di prensa. Pero como hurista, nos por spera, cu e mester por sa cu e lo no logra. E forma di skirbi carta asina pa prensa ta parce presidentenan di paisnan Sur Americano, den cual no tin respet ni pa derecho humano, corda libertad di expresion.
A cord’e con na Corsou, un minister-president a bay purba stroba prensa di traha tambe, pero a hay’e mal sirbi door di hues mr. de Wit. Awe e media tey, pero e politico ta for di arena politico! Ta pesey a corda e mandatario cu tin biaha bo mester ta masha cauteloso cu e leynan cu bo kier cambia awo (siendo den gobierno) pa limita e libertad di prensa pasobra ta e mesun leynan ey lo bo depende di dje mañan ora bo ta sinta den baki di oposicion. A corda e politico cu ningun hende ta bira minister pa semper, pues ta un funcion pasahero y sigur no pa purba kibra na libertadnan estableci den nos constitucion.
E hecho ta, cu si acaso e minister-president of e minister di husticia ta sinti nan mes menasa, nan mester cana e caminda penal. Mester bay polis y entrega un keho di menasa. Pero…nan sa cu huesnan ta sali bisa bo cu como politico bo mester tin un cuero basta diki pa wanta critica. Specialmente si bo yiu ta den pelea riba caya den bar anto tata di e otro persona sali defende su yiu. Ta di mes cu e no lo tira flor pa bo. Pero ironia di bida ta cu Minister Geoffrey Wever ta manda carta pa 24ora.com pero pa Michael Williams mes cu a papia no a manda ni un carta! Nos sistema no ta funciona asina, den cual media mester hunga hues pa husga kico esun cu ta dunando entrevista ta papia. Si un hende ta sinti su mes ofendi of menasa, e mester cana e caminda penal of legal, pero sigur no na adres di media.
Pio ainda cu, 24ora.com, a cumpli cu tur locual ta spera di un bon medio di comunicacion. Nos a scucha tur banda! A entrevista vocero di polis, cu a duna e banda oficial, a scucha e omo di e detenido cu tabata para pafo di cas y despues a scucha e tata cu a yama via telefon reacciona di exterior, pasobra e no tabata na Aruba. Su mayan a scucha minister-president pa duna banda como mama di su yiu, cu a entrega keho como victima di agresion den Gusto Nightclub y Åzia Restaurant.
Locual a hala atencion si ta, cu DTZ mester controla y supervisa radio y televionnan si. Y eynan no ta sigur si nan a sigui e reunion den parlamento den cual e mesun minister-president a lastra su coleganan di oposicion te na suela, pasando via radio y television di gobierno. Claro cu den parlamento tin inmunidad, pero no e transmision. DTZ lo sanciona e canalnan of lo manda carta pa Presidente di Parlamento?
Contal cu, ta mustra claramente, cu Minister Geoffrey Wever a bay cumpra un guera aki pa su amigonan di MEP, pero cu lo bay hinca e gobierno aki den basta problema aki na Aruba, sigur cu nos medio pero tambe cu mundo eyfo pa sa cu na Aruba, si un hende critica gobierno, mesora ta sali bisa cu lo bin cu ley pa regula prensa liber. Esey ta un menasa serio pa nos estado di derecho, nos libertadnan mara den nos constitucion y e democracia cu tanto “politiconan” ta papia di dje tur dia.
