Diasabra anochi despues di 11or, Polis a bay varios caminda pa cera diferente establecimento cu no ta cumpli cu e orario di cierre cu no ta mas laat cu 11’or di anochi. Un nightclub cu aparentemente a scapa tur e tempo, ta un nightclub cu ta medio scondi na airport pazuid.
Un nightclub cu yama “The Club” y cu ta opera riba permiso di e hoben J. Oduber di 22 aña. Aki mester bira miembro y unda bo lo haya un carchi di miembro y cu e mesun carchi ey ta swipe pa asina e porta habri. Aunke nan a keda opera tur e tempo sin wordo detecta, e biaha aki si nan turno a yega.
Polisnan a haya tip di e movecionnan marduga banda di Airport pazuid y bay controla y a confirma e informacion cu nan a haya. Un tiki promer cu 12’or di anochi (11:45 pm) e Team Unidadnan Motoriza di Polis a yega na e club y a informa tur esnan presente cu fiesta a caba y cu tur mester sali. Asina poco poco tur hende a cuminsa sali mientras un multa a wordo duna na e persona responsable e anochi ey.
Asina mes cu Polis tabata presente, ainda leu leu autonan tabata yega. Aki por conclui cu ya caba hendenan sa cu despues di 11’or ta “The Club” ta e lugar cu ta keda habri. Pero diasabra anochi esaki a jega na su fin. P’awe dilanti Polis lo pone “The Club” riba nan lista pa controla despues di e ora di cierre.
Mirando cu e ta scondi y no tin cas eybanda, e por a keda habri. Ora cu otronan tabata cera, gruponan tabata bay na The Club. E dianan aki mes a mira auto di ex minister y su socio amigo ruman marduga para eynan. Ora bo yega eyfo bo no sa mes cu tin un nightclub. Ta un porta tin y djey ta swipe como mienbro y drenta. Paden tin e ambiente scondi.
